502
13 июля 2018 в 12:18
Киинэҕэ киирэргэр пааспаргын көрдөр
18 саастарын туола илик Россия гражданнара киинэҕэ киириэхтэрин иннинэ пааспардарын ханнык түгэҥҥэ көрдөрүөхтээхтэрий? “Доруобуйаларыгар уонна сайдыыларыгар буортуну оҥорор иһитиннэрииттэн оҕолору көмүскээһин туһунан” уонна “Библиотека дьыалатын туһунан” сокуоннарга көннөрүүлэри киллэрэр туһааннаах докумуону Госдума от ыйын 3 күнүгэр бастакы ааҕыыга ылыммыта диэн Россия “Парламенын хаһыатын” таһаарыытыгар иһитиннэриллэр.
Докумуону билиһиннэрэн, культура миниистирин солбуйааччы Алла Манилова “оҕолорго аналлаах тэрилтэ” диэн өйдөбүл киллэриллэрин, оттон сексуальнай күүһүлээһини ойуулуур эбэтэр кэпсиир иһитиннэрии оҕолор ортолоругар тарҕанара бобулларын бэлиэтээбитэ.
“Эргиэн аптамааттарын туһанан оҕолорго анамматах иһитиннэрии бородууксуйатын тарҕатыыга сокуон бобууну олохтуур. Оттон сокуоннай сааһын туола илик гражданин күүһүнэн өттөйүүнү көрдөрөр киинэҕэ сылдьар баҕалаах буоллаҕына, киинэ театрдарын үлэһиттэрэ киниэхэ билиэти атыылыахтара суоҕа”, — диэтэ Манилова.
Бибилэтиэкэрдэр эмиэ сокуоннай сааһын туола илик гражданиҥҥа итинник ис хоһоонноох кинигэлэри уонна аудиодискэлэри биэриэ суохтаахтар. “Оттон иһитиннэрии бородууксуйатын сааһынан хааччахтаан (“0+”, “6+”, “12+”, “16+” уонна “18+”) маркировкалааһын туһунан балаһыанньалар уопсай тииһимньилээх бибилэтиэкэлэр фондаларыгар 2012 сыл балаҕан ыйын 1 күнүгэр диэри киирбит иһитиннэрии бородууксуйатыгар тарҕамматтар”, — диэн бэлиэтээтэ культура миниистирин солбуйааччы.
Кини этэринэн, регионнарга оҕо саадтарыттан, оскуолалартан, айар дьиэлэртэн уонна поликлиникалартан 100 миэтэрэ иһинэн оҕо психическэй доруобуйатыгар буортуну аҕалыан сөптөөх иһитиннэриилээх афишаны килиэйдээһиҥҥэ регигоннар бобууну киллэрэр туһунан көҕүлээһиннэрэ суолталаах.
