Киинэ сценаристарын хантан ылабыт?

Ааспыт сылга Россияҕа 58 мөлүйүөн көрөөччү киинэҕэ сырытта диэн Култуура министиэристибэтин дааннайдара этэллэр. Ити 2012 сыллааҕар баара-суоҕа 16 бырыһыанынан элбэх. Онуоха эбии Голливуд блокбастердара саамай элбэх касса хомуурун биэрэллэр. Онон омук дойдуларын киинэлэрин кытта күрэстэһэр туһугар Россия киинэтигэр судаарыстыба өйөбүлэ уонна үчүгэй сценарийдар наадалар. Ханнык да уотунан-күөһүнэн, тыаһынан-ууһунан орто баайыы ис хоһоонноох киинэни өрө тардыбаккын. Итинник санаа Госдума култуураҕа кэмитиэтин “төгүрүк остуолугар” этилиннэ.

Киинэ хаачыстыбата доҕолоҥнуур

Биэдэмистибэҕэ этэллэринэн, ааспыт сыл киинэҕэ өлгөм үүнүүлээх буолбут. Ол эрээри экспердэр итини кытта сөпсөспөттөр. Биллэн турар, киинэҕэ сылдьыы ахсаана элбээбит, ол эрээри Россия киинэтин талыы уруккутун курдук аҕыйах.
“Мосфильм” генеральнай директора Карен Шахназаров көрөөччү интэриэһэ намтаабытын төрүөтүнэн киинэ хаачыстыбата мөлтөҕүн этэр. Атын төрүөт – Россияҕа уруккутун курдук олус аҕыйах киинэ уһуллар. Тэҥнэбилгэ, Франция сылга 400 киинэни таһаарар эбит.

Эдэрдэргэ — бырагырааманы

“Киинэлэр төһө көдьүүс­тээхтэрин сыаналааһын ирдэбиллэрэ ханна барытыгар биирдэр — бу касса хомуура, телевидениеҕэ киинэ рейтинэ, Интернеккэ көрүү ахсаана, фестивалларга наҕараадалар уонна бириистэр”, — диэн ааҕар “Ленфильм” киинэ студиятын директордарын сэбиэтин бэрэссэдээтэлэ Федор Бондарчук. Биллэн турар, ити ирдэбиллэргэ эппиэттиир киинэлэр Россияҕа да бааллар, ол эрээри олус элбэҕэ суохтар. Култуура министиэристибэтин уонна Киинэ фондатын татым бюджетыгар маннык киинэлэри элбэҕи устубаккын. Ол курдук, 2018 сылга киинэ салаатыгар бэриллибит 9 млрд солкуобай 130 оонньуулаах киинэни устууга ороскуоттаммыт.
Биллэр режиссер уонна Госдума култуураҕа кэмитиэтин баһылыгын бастакы солбуйааччы Владимир Бортко “кытай суолунан” барарга – Аҕа дойду киинэтин ордук өйүүргэ этиилээх. “Киинэ прокатын 90 бырыһыана биһиэнэ буолуох тустаах”, — диэн ааҕар кини. Ол эрээри кинини атыттар өйөөбөтүлэр. Итинник кытаанах дьаһаллары култуура кэмитиэтин баһылыга Елена Ямпольская утарар. Кини талааннаах айымньылары таһаарыыны көдьүүстээҕинэн ааҕар.
Үчүгэй киинэ мэктиэтэ – хаа­чыстыбалаах сценарий. Ол эрэн салааҕа уонунан сылларга харчы бэриллибэтэҕин түмүгэр Аҕа дойду сценаристарын оскуолата сүттэ. Билигин ВГИК выпускнига талааннаах сценарийы суруйдаҕына да, уруккута 29 саастаах Никита Михалковка курдук, киниэхэ киинэни уһулары итэҕэйэллэрэ саарбах. Карен Шахназаров редактордар институттарын төннөрөргө, сценарийы кытта олохтоон үлэлэһэргэ этии оҥордо.
ВГИК ректора Владимир Малышев эдэр киинэ деятеллэригэр туспа судаарыстыбаннай бырагырааманы үөскэтэргэ эттэ. “Төгүрүк остуол” кыттыылаахтарын санаатынан, ити дьаһал сценаристарга кадр резервэтин тэрийиигэ тиэрдиэҕэ уонна Аҕа дойду кинематографиятыгар албан аатын төнүннэриэҕэ.