Кыайыы күнүгэр биир кэмнээх төлөбүр

/ Ыйаах /

Саха сирин баһылыга Айсен Николаев 1941-1945 сс. Аҕа дойду Улуу сэриитигэр Кыайыы 74 сылынан сибээстээн гражданнар сорох категорияларыгар биир кэмнээх төлөбүр туһунан ыйаахха илии баттаата

Ыйаах быһыытынан, Кыайыы күнүгэр Аҕа дойду Улуу сэриитин инбэлииттэрэ уонна кыттыылаахтара 15-тии тыһ. солк. ылыахтара, 10 тыһ. солк. – Аҕа дойду Улуу сэриитигэр өлбүт дьон огдооболоро уонна “Блокадаламмыт Ленинград олохтооҕор” бэлиэнэн наҕараадаламмыттар. Аҕа дойду Улуу сэриитин өлбүт кыттыылаахтарын огдооболоругар, сокуоннай саастарын туолбакка сылдьан Иккис аан дойду сэриитин саҕана фашистар уонна кинилэр куомуннаахтара тэрийбит концлааҕырдарыгар, геттоларга, атын миэстэлэргэ күһэйэн хаайыллыбыт дьоҥҥо 5 тыһ. солк. суумалаах төлөбүрдэр ананаллар.
Ил Дархан быһаарбытынан, “2018-2022 сс. Саха Өрөспүүбүлүкэтигэр гражданнарга социальнай өйөбүл” судаарыстыбаннай бырагыраама чэрчитинэн төлөбүрдэр өрөспүүбүлүкэ бюджетыттан оҥоһуллуохтара.
Бу Ыйаах Саха сиригэр олорор гражданнарга тарҕанар. Биир кэмнээх төлөбүрү СӨ үлэҕэ уонна социальнай сайдыыга министиэристибэтэ ааҕан ыытыаҕа.

СӨ Ил Дарханын уонна Бырабыыталыстыбатын пресс-сулууспата