Кытай худуоһунньуктарын кытары көрсүһүү

Санатар буоллахха, соторутааҕыта Национальнай ойуулуур-дьүһүннүүр музей саалатыгар кытай алта худуоһунньугун уонна каллиграфтарын быыстапката буолан ааспыта. Каллиграфия – ойуулуур-дьүһүннүүр искусство чыпчаала. Киһини толкуйдатар, дириҥ философиялаах. Кытайга иероглибынан суруйуу аҕыс тыһыынча сыл анараа өттүгэр үөдүйбүтэ биллэр. Бу олус сыаналанар уонна кэрэхсэнэр үлэ. Саха сирин олохтоохторо, искусствоны сэргээччилэр хартыыналары кэрэхсээтилэр. Кытай худуоһунньуктара үлэлэрин музейбытыгар бэлэхтээн үөртүлэр.
Ил Түмэн Бэрэссэдээтэлэ Александр Жирков, бастатан туран, кытайдарга бачча ыраах сиргэ — Саха сиригэр айаннаан кэлбиттэригэр махтанна. Иккиһинэн, кытай норуота түҥ былыргыттан илдьэ кэлбит свитоктарын быыстапкалыы кэлбиттэрин биһириирин биллэрдэ. «Кытай Народнай Республиката уонна Россия культура эйгэтигэр доҕордуу сыһыаннаахтар. 2015 сыл ахсынньы ыйыгар Пекин куоракка Россия культуратын күннэрин чэрчитинэн Саха сирин культуратын күннэрэ ыытыллыбыттара. Ити тэрээһиҥҥэ биһиги республикабыт театрдара, профессиональнай коллективтар ситиһиилээхтик кыттыбыттара.
Олоҥхо театра Пекин куорат олохтоохторугар кытай классика буолбут “Пионовая беседка” драматын сахалыы тылынан көрдөрбүтэ. Онтон ЮНЕСКО шедеврынан биллэр, аар саарга аатырар Куньцюй театра Былатыан Ойуунускай “Туналҕаннаах ньуурдаах Туйаарыма Куо” олоҥхотун кытай тылынан оонньообута. Биһиги народнай суруйааччыбыт Николай Лугинов «Улуу Хууннар» айымньытын кытай тылынан тылбаастаабыттара бу үрдүк чыпчаал дии саныыбын», — диэн спикер санаатын үллэһиннэ.
Хас да сыллааҕыта худуоһунньук Юй Гуан Шэн Саха сириттэн сылдьар делегацияҕа бэйэтин айар үлэтин көрдөрбүт уонна Николай Лугиновка Лао Цзыны уруһуйдаабыт мэтириэтин, «Улуу Хууннар» кинигэҕэр туһанаар диэн бэлэхтээбит. “Биһиги Саха сиригэр бу иккис сырыыбыт. Саха дьоно Кытай норуотун иероглибын, ойуулуур-дьүһүннүүр искусствоҕа төрүт үгэһин өйдүө”, — диэн эрэнэрин эттэ. Кини айар үлэлэриттэн биирдэстэрин, хас да сыллааҕыта Андрей Борисов мэтириэтин суруйбутун ойуулуур-дьүһүннүүр искусство музейыгар көрүөххэ сөп.
Кытай худуоһунньуктара Александр Жирковка көрсүбүтүгэр махтаннылар. Спикер инникитин даҕаны доҕордуу сыһыан уостубакка, өссө да саҥа үлэлэр тахса туралларыгар баҕарда.