12 мая 2017 в 11:51

Үлэ киһини сааһынан араарбат

Кытай бөлүһүөгэ Конфуций: “Эдэр кэмнээҕэр кырдьар сааска өссө элбэхтик үлэлиэххэ, дьыаланы оҥоруохха наада”, — диэн эппиттээх. Ону бигэргэтэрдии, үгүс сайдыылаах дойдуларга сааһырбыт дьон сокуону оҥорор былаас эйгэтигэр үлэлииллэр, оттон ол оннугар толоруулаах былааска — суохтарын кэриэтэ.

2017 сыллааҕы чахчыларынан, Судаарыстыбаннай Дуумаҕа итинник балайда сааһырбыт дьокутааттарынан буолаллар: Жорес Алфёров – 87 саастаах, Говорухин Станислав Сергеевич, култуура кэмитиэтин бэрэссэдээтэлэ, 82-тэ, Кулик Геннадий Васильевич – 82 саастаах, Ресин Владимир Иосифович – 81-рин туолбут, Кобзон Иосиф Давыдович, 80-на. Ону сэргэ 69-79 саастаах 17 дьокутаат баар.

Федерация Сэбиэтин чилиэннэрин ортолоругар саамай аҕа саастааҕынан 93-тээх Долгих Владимир Иванович буолар. Рыжков Николай Иванович 88 туолбут. Эмиэ 69-79 саастарыгар сылдьар 16 киһи Федерация Сэбиэтигэр үлэлиир.
Федерация Сэбиэтин маннык аарыма кырдьаҕастарыгар тэҥнээтэххэ, Ил Түмэҥҥэ биһиги аксакалларбыт – Власов В.М., Губарев В.Н., Уаров А.С. балайда эдэрдэринэн ааттаныахтарын сөп.
Сокуону оҥорор былааска маннык дьон талыллыыларын сүрүн сыала – сибиэһэй өйү-санааны, эдэр сааһы, эрчими кытта мындыр өй, идэтийии, үөрүйэх сомоҕолоһуулара.
Сергей РОМАНОВ.