681
03 ноября 2017 в 15:00
Мэҥэ-Хаҥалас Тумулугар — саҥа хотон
Саха Өрөспүүбүлүкэтин Ил Түмэнин тыа сиригэр уонна аграрнай политикаҕа сис кэмитиэтин бэрэссэдээтэлэ Дмитрий Саввин уонна дьиэ кэргэн, оҕо аймах, ыччат, спорт, физическэй культура сис кэмитиэтин бэрэссэдээтэлэ Юрий Баишев алтынньы 27 күнүгэр Мэҥэ-Хаҥалас улууһугар Тумулга Таисия Десяткина салайааччылаах «Тумул» тыа хаһаайыстыбатын оҥорон таһаарар кооперативын 120 төбө ыанньык ынахха анаммыт хотонун аһыллыытыгар кыттыыны ыллылар.
Үөрүүлээх тэрээһин чэрчитинэн тыа хаһаайыстыбатын үлэһиттэригэр аналлаах семинар ыытылынна. Мунньахха Саха Өрөспүүбүлүкэтин Бырабыыталыстыбатын Бэрэссэдээтэлин бастакы солбуйааччы – тыа хаһаайыстыбатын миниистирэ Петр Алексеев, тыа хаһаайыстыбатын сүрүннүүр департаменнарын салайааччылара Артем Александров, Василий Афанасьев, Василий Чичигинаров, Мэҥэ-Хаҥалас улууһун баһылыга Николай Старостин, улуус тыатын хаһаайыстыбатын управлениетын салайааччыта Иван Аргунов уонна тыа хаһаайыстыбатын салаатын үлэһиттэрэ кыттыыны ыллылар. Мунньах кыттыылаахтара үлэ хаамыытынан тоҕус ыйдаах былаан туолуутун торумнастылар.
Улуус тыатын хаһаайыстыбатын управлениетын салайааччыта Иван Аргунов кэпсээбитинэн, улууска түөрт соҕотуопкалыыр тэрилтэ үлэлиир, хаалыы сүрүннээн иэдьэгэйи оҥорууга баар. Кооперативтар былааннарын толорон иһэллэр. Идэһэ кэмэ саҕалана илик буолан, сүөһү ахсааныгар уларыйыы суох. Бу хаалбыт икки аҥаар ыйга сүөһү ахсаанын төһө кыалларынан аҕыйаппат сорук тыа хаһаайыстыбатын исписэлиистэригэр турар. Оттооһуҥҥа киирдэххэ, быйылгы былаан 41180 тонна эбит буоллаҕына, туолуута 40197 тонна. Ол аата былаан 98% туолбут. Бүтэһик ыйдарга үүт тутуута үчүгэйинэн ааҕыллар.
Мэҥэ-Хаҥаласка кэнники сылларга тыа хаһаайыстыбатын тутуулара ыытылыннылар. Ол курдук, нэһилиэктэргэ саҥа хотоннор үлэҕэ киирэннэр үрүҥ илгэни үрүлүтэллэр. Маныаха, быйыл улууска саҥа саҕалыыр аҕыс хаһаайыстыба грант ылбыта төһүү күүс буолла.
Сис кэмитиэт бэрэссэдээтэлэ Дмитрий Саввин «Тумул» кооператив ыанньыксыттарыгар Евдокия Власоваҕа, Саргылаана Елисееваҕа таһаарыылаах үлэлэрин иһин Ил Түмэн тыа сиригэр уонна аграрнай политикаҕа сис кэмитиэтин Бочуотунай грамоталарын туттарда.
