Наталья Румянцева эдэр предпринимателлэргэ грант олохтоото

Өрөспүүбүлүкэ народнай депутата Наталья Румянцева Нам улууһун эдэр предпринимателлэригэр грант олохтоото. “Колми” ХЭТ граныгар куонкуруһу ыытыы туһунан иһитиннэрии быйыл кулун тутарга Нам улууһугар тэнийбитэ. Бэйэлэрин бизнес-бырайыактарынан барыта 8 эдэр предприниматель кытынна. Куонкурус усулуобуйаларынан, улуус сиригэр-уотугар регистрацияламмыт уонна 6 ыйтан итэҕэһэ суох кэмҥэ үлэлиир 18-35 саастаах эдэр дьон кыттыахтарын сөбө.

Нам сэлиэнньэтин бизнес-инкубаторыгар муус устар 11 к. бизнес-бырайыактары көмүскээһин буолла итиэннэ куонкурус хамыыһыйата граҥҥа кыайыылааҕы быһаарда. Бу күрэххэ таҥас тигэр уонна өрөмүөннүүр, тутуунан, туризмынан, чэбдигирдэр үлэнэн, миэбэли оҥоруунан дьарыктанар предпринимателлэр кытыннылар. Биир киһини чопчу талан ылар олус уустук буолбутунан сибээстээн, “Колми” ХЭТ салайааччылара өссө биир эбии миэстэни олохтуурга быһаарбыттара.
Муус устар 15 к. Нам улууһун нэһилиэктэрин баһылыктарын кытта планеркаҕа куонкурус кыайыылаахтарыгар сертификаттары үөрүүлээхтик туттарыы буолан ааста. Грант хаһаайынынан чааһынай предприниматель Розалия Новгородова буолла, кини сыл аҥаарын анараа өттүгэр Хамаҕатта сэлиэнньэтигэр таҥас тигэр ателье аспыта. Кыыс таҥас тигэр тэрили атыыласпыта, эргиэн киинигэр хос куортамнаспыта. Билигин Олоҥхо Ыһыаҕар саха таҥаһын тигиинэн дьарыктанар, ону таһынан биирдиилээн сакаастары ылар. Кини инникитин түүлээхтэн араас оҥоһуктары тигэр уонна чөлүгэр түһэрэр оборудование атыылаһар былааннаах. Ательеҕа кинини кытта өссө икки маастар үлэлиир.

“Хатан” спортивнай кулууп салайааччыта Афанасий Назаров анал бирииһи ылла. Эдэр киһи быйыл кросс-фит хайысханан кулууп үлэтин тэрийдэ. Билигин киниэхэ 70 киһи дьарыктанар. Олорор сирдэрин кэҥэтэр, эбии инвентарь атыылаһар, тренергэ анаан эбии үлэ миэстэтин таһаарар былаан баар.

Инна Сивцева