Нуораҕанаҕа үлэ күүһүн көрдөрдүлэр

Мэҥэ-Хаҥалас улууһун Нуораҕана сэлиэнньэтигэр убайдыы-бырааттыы Борисовтар кэриэстэригэр уонна Сомоҕолоһуу сылыгар анаммыт оттук маһы бэлэмнээһиҥҥэ “Үлэ күүһэ – 2019” күрэх аан бастаан тэрилиннэ. Бу араас бырагыраамалаах бырааһынньыгы Борисовтар оҕолоро уонна сиэннэрэ тэрийдилэр. Манна кэккэ дэриэбинэлэртэн эр дьон кытыннылар. Күрэх кэнниттэн бэлэмнэммит оттук маһы Нуораҕана 20 дьиэ кэргэнигэр тиэртилэр.

Мэҥэ-Хаҥалас улууһун Балыктаах, Тумул, Нуораҕана, Төҥүлү сэлиэнньэлэриттэн уонна Чурапчы улууһун Чыаппаратыттан саамай күүстээх, саталлаах уонна бэйэлэригэр эрэллээх ыал аҕалара үлэ күүһүн көрдөрдүлэр. Алталыы кыттааччылаах алта хамаанда кытынна. Хас биирдии хамаанда икки лесовоз оттук маһы бэлэмнээтэ.
Михаил Иванович уонна Михаил Федорович Борисовтар кэриэстэригэр анаммыт «Үлэ күүһэ – 2019» норуот бырааһынньыгар кубулуйда. Бу икки киһи биир дойдулаахтарыгар бэйэлэрин үлэлэринэн саамай сырдык өйдөбүлү хаалларбыттара. Үлэ бырааһынньыгын кинилэр оҕолоро уонна сиэннэрэ Борисовтар, өрөспүүбүлүкэ икки биллэр предпринимателэ уонна мецената Руслан Федотов уонна Вячеслав Нестеров тэрийдилэр.
Сыаналаах бириистэр оонньоннулар, эстрада сулустарын кэнсиэрэ, Нуораҕана күөлүгэр оҕунан уонна пневматическай саанан ытыыга күрэхтэһиилэр буолан аастылар. НХЗ GROUP миньигэс астарынан күндүлээтэ. Норуот бырааһынньыгар дэриэбинэ дьоно бары таҕыста. Күрэхтэһии кыттыылаахтар параадтарыттан уонна бочуоттаах ыалдьыттар эҕэрдэлэриттэн саҕаланна.
«Бу күрэх дьоҥҥо көмө оҥорор сыаллаах. Бэлэмнэммит 120 куб. мас 20 дьиэ кэргэҥҥэ тиэрдиллиэҕэ, ол иһигэр Нуораҕана сэлиэнньэтигэр сэрии, үлэ ветераннарыгар уонна элбэх оҕолоох ыалларга. Ону сэргэ сыаналаах бириистэри оонньотууттан киирбит харчы уопсай баанньыгы тутууга ананыаҕа. Биһиги бырайыакпытын өйөөбүттэрин уонна өйдөөбүттэрин иһин нэһилиэк баһылыгар Сергей Сергучевка уонна тэрээһин бары кыттыылаахтарыгар махтанабыт. Үлэ бырааһынньыга бэркэ табыллыбытыттан үөрэбит, кыттыылаахтар уонна сэлиэнньэ олохтоохторо улаханнык астыннылар. Олохтоохтор маннык күрэх сыллата ыытылларыгар этии киллэрдилэр, биһиги ону толкуйдуохпут», — диэтэ НХЗ GROUP генеральнай директора Вячеслав Нестеров.
Күрэх түмүгэр хаһаайыттар күүстэринэн, сымсаларынан атыттардааҕар чорбойдулар. Бастакы уонна иккис миэстэлэргэ «Нуораҕана-1» уонна «Нуораҕана-2» хамаандалара таҕыстылар. Үһүс миэстэни Чурапчы улууһун «Чыаппара» хамаандата ылла. Күрэх кыайыылаахтара уонна кыттыылаахтара дипломнарынан уонна өйдөбүнньүк сыаналаах бэлэхтэринэн наҕараадаланнылар.

А. Шадрина