Олоххо тыын суолталаах эмтэринэн хааччыйыы судургутуйуоҕа

“Россия Федерациятыгар олохтоох салайыныыны тэрийии уопсай тускулларын туһунан” ФС 82.1 ыстатыйатын билигин үлэлиир редакциятыгар этиллибитинэн, регион былааһа оттук-энергетика ресурсаларын, ас-үөл табаардарын уонна производственнай-техническэй аналлаах бородууксуйаны хааччыйааччылары быһаарар итиэннэ тиэрдиини тэрийэр бырааптаах. «Атын табаардары уонна өҥөлөрү кэрискэҕэ киллэрии көҥүллэммэт», — диэн сокуоҥҥа этиллэр.
Сокуон барылын ааптардара бэлиэтииллэринэн, табаары тиэйии болдьоҕо хааччахтаммыт ыраах сытар нэһилиэнньэлээх пууннарга таһаҕаһы тиэрдии сыаната үрдүгүттэн (үгүс өттүгэр ити ахсынньы — кулун тутар, тиэрдиигэ анаан кыһыҥҥы суол туһаныллар) аптекалар эми сакаастыыллара табыгаһа суох, ол курдук сокуоҥҥа бигэргэтиллибит препараттар сыаналарыгар муҥутуур эбии сыана ороскуоттары саппат.
«Таһаҕаһы (бородууксуйаны) тиэйии болдьоҕо хааччахтанар Уһук Хоту сир оройуоннарыгар уонна онно тэҥнэниллибит миэстэлэргэ баар аптека тэрилтэлэрэ эргитэр үптэрэ тиийбэт буолан, наадалаах кээмэйинэн уонна ахсаанынан эмп препараттарын атыылаһыыга ыарахаттары көрсөллөр», — диэн быһаарыы сурукка бэлиэтэнэр.
Сокуон барылын ааптардара итини сэргэ Уһук Хоту сир уонна Арктика оройуоннарыгар эмп тиийбэт буолан, үгүстүк санитарнай авиарейстэри ыҥырарга күһэллэллэрин, ону судаарыстыба төлүүрүн, түмүгэр эми тиэрдии сыанатыттан балачча улаатан тахсарын этэллэр.
Манан сибээстээн, сокуону оҥорооччулар “Олохтоох салайыныыны тэрийии уопсай тускулларын туһунан” ФС 82.1 ыстатыйатыгар суруллар таһаҕас кэрискэтигэр эмп препараттарын эбии киллэрэргэ, ону сэргэ ити боломуочуйалары “Эмп средстволарын эргиирин туһунан” ФС-ҥа бигэргэтэргэ этии оҥордулар.