Петр Гоголев быыбардааччыларыгар отчуоттаата

СӨ Судаарыстыбаннай Мунньаҕын (Ил Түмэн) Бэрэссэдээтэлэ Петр Гоголев кулун тутар 27 к. 17 №-дээх орто оскуола аактабай саалатыгар быыбардааччылар уонна уопсастыбаннас иннилэригэр депутат быһыытынан туох үлэни ыыппытын отчуоттаата. Итини сэргэ Ил Түмэн депутата Александр Сусоев, Дьокуускай куорат Думатын депутаттара Степан Павлов уонна Алексей Осипов отчуоттарын билиһиннэрдилэр.

Өрөспүүбүлүкэ Баһылыга Айсен Николаев сомоҕолоһууга олук уурбут соруктарын тутуһан, Университет уокуругуттан Саха сирин депутаттара уокурук олохтоохторун интэриэстэрин утумнаахтык уонна былаан быһыытынан туруулаһар сыалтан бэйэлэрин күүстэрин сүрүннүөхтэрэ диэн Петр Гоголев тыл этиэн иннинэ бэлиэтээтэ.
«Университет уокуругуттан Ил Түмэҥҥэ 4 депутат талыллыбыта, ол иһигэр Александр Сусоев, Иннокентий Романов уонна Мичил Николаев. Биһиги политическай көрүүлэрбитин туора ууран, бэйэбит уокурукпут туһугар кыттыһан үлэлииргэ быһаардыбыт. Бу ыллыктаах уонна сөптөөх быһаарыы, ол эбэтэр куорат кыһалҕалара политическай мөккүөрдэртэн тутулуга суох быһаарыллыах тустаахтар. Онон манна биһиги түмсүүлээхпит», – диэн бэлиэтээтэ парламент спикерэ.

2018 сыл төрдүс кыбартаалыгар Петр Гоголев Уопсастыбаны кытта үлэлиир приемнайыгар барыта 30 киһи көрсүһүүгэ кэлэ сылдьыбыт. Сорох туруорсуулар быһаарыллыбыттар, атыттарга үлэ салҕанар.
Петр Васильевич бэлиэтээбитин курдук, киэҥ хабааннаах экология проблемаларыттан саҕалаан тус, чопчу көрдөһүүлэринэн түмүктээн, нэһилиэнньэ араас боппуруостары көтөҕөр. Кини эбэн эппитинэн, Уопсастыбаннай приемнай депутат уонна уокурук олохтоохторун икки ардыларыгар бииргэ үлэлээһин көдьүүстээх ньыматын быһыытынан бэйэтин көрдөрдө.
«Быйылгы сылга биһиги балайда улахан соруктары туруорабыт, олортон биир бастакы суолталаахтара – оскуолаларга оҕо үөрэнэр миэстэтин элбэтиини быһаарыы. Туох да кистэлэ суох, ити туһунан бары таһымҥа дьүүллэһии барар, ол иһигэр Саха сирин Бырабыыталыстыбатын таһымыгар. Өрөспүүбүлүкэ Баһылыга бу боппуруоһунан Россия Президенигэр быһаччы тахсыбыта. Үөрэнэр миэстэ тиийбэтин кыһалҕата – Дьокуускайга, ордук биһиги уокурукпутугар саамай сытыы боппуруостартан биирдэстэрэ. Биһиги 17 №-дээх оскуолаҕа кэлэн олоробут, бу оскуола эрдэттэн 350 үөрэнээччигэ былааннаммыта, ол эрээри бүгүн манна 1700 кэриҥэ оҕо үөрэнэр», – диэтэ Петр Гоголев.

Кини салгыы бэлиэтээбитинэн, 2019 сылга оскуолаҕа сыһыары тутууга анаан бырайыак-смета докумуоннарын оҥорууга харчыны булуу соруга турар. Куорат мэра Сардаана Авксентьева иһитиннэрбитинэн, оскуоланы тутуу былааҥҥа киирбит.
Петровскай аатынан уулусса 29/4 – Лермонтов уул. 90/5 аадырыстарыгар олорооччулар туруорсууларынан, “Норуот бюджета” куонкуруска кыттыыга анаан олбуору тупсарыы бырайыагын бэлэмнээһиҥҥэ Петр Гоголев көҕүлүүр бөлөҕү тэрийбит. Ити түмүгэр оҕо спортивнай былаһааккатын тутууга, массыына турар сирин оҥорууга уонна сынньанар зонаны тэрийиигэ анаан 1 мөл. солк. кээмэйдээх граны сүүйбүттэр.
«Сайсаардааҕы уокурук быраабатын көҕүлээһининэн итиэннэ куорат былаастарын, куорат баһылыгын өйөбүллэринэн быйыл төрөөбүтэ 100 сыла туолар Сэбиэскэй Сойуус Дьоруойа Владимир Дионисьевич Лонгинов аатынан сквер тутуутун саҕалыахпыт. Биһиги ону Улуу Кыайыы 75 сылыгар тутан бүтэриэхтээхпит», – диэн иһитиннэрдэ Петр Гоголев.
Кини итини сэргэ бэйэтин отчуотугар Сайсаар уокуругар элбэх оҕолоох дьиэ кэргэттэргэ анаан «Волонтер автобуһа» бырайыагы таарыйда. Уокурукка олорор элбэх оҕолоох ыаллар айылҕаҕа сынньана тахсалларыгар тырааныспары булууга уустуктары көрсөллөр эбит. Петр Васильевич этэринэн, бүгүҥҥү күҥҥэ тырааныспар номнуо булуллубут, ити бырайыак ыам ыйыгар олоххо киириитэ сабаҕаланар.
Дьулус Борочков