Петр Гоголев Семен Кулебякины ситиһиитинэн эҕэрдэлээтэ

Аармыйа сулууспалаахтарын норуоттар икки ардыларынааҕы оонньуутугар хантараагынан сулууспалыы сылдьар саха уола Семен Кулебякин Арассыыйа сүүмэрдиир хамаандатыгар киирэн кыайыылаах тахсыбыт.

Саха өрөспүүбүлүкэтин судаарыстыбаннай мунньаҕын (Ил Түмэн) бэрэссэдээтэлэ Петр Гоголев сержант Семен Кулебякины үрдүк ситиһиитинэн эҕэрдэлээтэ.
“Саха дьоно Араассыыйа Байыаннай-Морской флотун хамаанадатын састаабыгар саха ыччата киирэн дойду чиэһин көмүскээбитин туһунан киэн тутта истибитэ. Бу сонун өрөспүүбүлүкэ олохтоохторун олус үөрдүбүтэ”, — диэн Ил Түмэн спикерын эҕэрдэ суругар этиллэр.
Морской пехотинецтар куонкурустара Калининградскай уобаласка үс түһүмэҕинэн ыытыллыбыт. Дойдуҥ чиэһин туһугар кыттар бочуоттаах уонна эппиэтинэстээх. Ол курдук Арассыыйа хамаандата күүстээҕин туоһулаан кыайбыт. Ол туһунан Петр Гоголев бэлиэтиир.
“Семен, эн төрөөбүт нэһилиэккин, Бүлүү улууһун, Саха сирин достуойунайдык көрдөрдүҥ. Өрөспүүбүлүкэ эйигиннэн уонна эн ситиһиилэргинэн киэн туттар. Өссө бэйэҥ оскуолаҥ кадетскай кылааһыгар эн үчүгэйдик үөрэммиккин, этирээтиҥ хамандыырынан буоларыҥ, күүстээх санаалааҕыҥ уонна туруоруммут сыалгын ситиһэр дьулуурдааҕыҥ биллэрэ. Байыаннай буоларга сыал туруоруммуккун уонна ону ситиһэргэ күүскэ бэйэҕин эрчийбиккин. Эн учууталларыҥ бэлиэтииллэринэн, дойдуҥ, чугас дьонуҥ иһин эппиэтинэһиҥ күүстээх”, — диэн парламент бэрэссэдээтэлэ суруйар. Кини Семен төрөппүттэригэр Виктор Ивановичка, Любовь Владимировнаҕа дойду дьиҥ патриотын иитэн таһаарбыттарын, ыарахаттартан чаҕыйбат уолларын иһин махтал тылын тиэрдэр.
“Владивосток куорат морской пехота 155 биригээдэтин офицердарыгар, эн хамандыырдаргар туспа махтал тылларын этэбин. Кинилэр эн лидерскай хаачыстыбаҕын өтө көрөн, эт-хаан уонна өй-санаа өттүнэн бэлэмнээххин сыаналаан норуоттар икки арыдарынааҕы таһымнаах куонкуруска кыттаргар эрэммиттэр, дойду чиэһин көмүскүүргэр итэҕэйбиттэр”, — диэн эбэн этэр уонна Саха сирин парламенын спикера Семен Кулебякиҥҥа кытаанах доруобуйаны, ситиһиилэри баҕарда.