«Саҥа саҕалыыр фермер» интеллектуальнай оонньуу

Куонкурус Саха сирин эдэр фермердэригэр улахан интэриэһи тардар. Тыа хаһаайыстыбатын техникумугар ыытыллыбыта иккис сыла.
Быйыл бу улахан куонкурус өрөспүүбүлүкэтээҕи түһүмэҕэр 102 агрооскуолаттан 14 бэрэстэбиитэл Амма, Үөһээ Бүлүү, Горнай, Кэбээйи, Мэҥэ-Хаҥалас, Нам, Ньурба, Өлүөхүмэ, Сунтаар, Таатта, Томпо, Хаҥалас, Чурапчы агрооскуолаларыттан, Дьокуускайтан кыттыыны ылаллар.
Антонина Григорьева Ил Түмэн аатыттан мустубут дьону регионнааҕы түһүмэх арыллыытынан эҕэрдэлээтэ, бу куонкурус агрооскуола үөрэнээччилэрин оҥорон таһаарар биригээдэлэриттэн бастыҥтан бастыҥы таһаарыа диэн бэлиэтээтэ.

«Саҥа саҕалыыр фермер» Бүтүн Арассыыйатааҕы интеллектуальнай оонньуу номнуо VII төгүлүн ыытыллар. Саха Өрөспүүбүлүкэтигэр быйыл төрдүстээн буолар. Куонкурус сыала үөрэнээччи тыа хаһаайыстыбатыгар бизнес-былааны оҥорор үөрүйэҕин сайыннарыы, информацияны хомуйуу, ырытыы, салайар дьоҕуру сайыннарыы, хамаандаҕа үлэлиир сатабылы иҥэрии буолар. Бырайыак талааннаах ыччаты буларга, кинилэри өйүүргэ көмөлөһөр, үөрэнээччилэр тыа хаһаайыстыбатыгар, экономикаҕа, бизнес-былааҥҥа, менеджмент эйгэтигэр билиилэрин хаҥатар, ыччат кыттыгас фермерскэй хаһаайыстыбаны арыйарга граҥҥа кыттарыгар уонна саҥа саҕалыыр фермер биир кэмнээх көмөнү ыларыгар тустаах иһитиннэриини буларыгар күүс-көмө буолар, кыттааччылар таһымнарын үрдэтэргэ туһуланар», – диэн норуот дьокутаата эттэ.
Кини бэлиэтииринэн, Саха Өрөспүүбүлүкэтигэр тыа хаһаайыстыбатыгар хайысхалаах үөрэхтээһин наадалааҕын көрдөрдө. Мэҥэ-Хаҥалас В.П. Ларионов аатынан Майа орто оскуолатын үөрэнээччилэрин биригээдэтэ 2017 сыллаахха өрөспүүбүлүкэтээҕи түһүмэххэ «Мүөтү оҥорон таһаарыы уонна батарыы» диэн бизнес-бырайыагынан бастакы миэстэни ылбыта, онтон Москваҕа «Саҥа саҕалыыр фермер» Бүтүн Арассыыйатааҕы интеллектуальнай оонньууга дьаныардаах киирсиһии түмүгэр кыайыы өрөгөйүн билбитэ. Былырыын өрөспүүбүлүкэтээҕи түһүмэххэ бастакы миэстэни Уус-Алдан Тулуна оскуолата ылбыта. Агрооскуолалар үөрэнээччилэрэ атыттартан чорбойор өрүттэрэ элбэх. Бастатан туран, кинилэр төрөөбүт сирдэригэр-уоттарыгар хаһаайынныы сыһыаннаахтар, уйулҕа, эт-хаан өттүнэн күүстээхтэр. Иккиһинэн, кинилэри үлэҕэ үтүө үлэһит дьон, уопуттаах маастардар (ветеринар, агроном, инженер уо.д.а.) уһуйаллар. Үсүһүнэн, тыа сиригэр үрдүттэн олорон үөрэнэр, чинчийэр кыахтаахтар.
Вице-спикер «Саҥа саҕалыыр фермер» кыттааччыларыгар ситиһиини, үрдүк көрдөрүүнү уонна туруорбут соруктарын толороллоругар, оттон уһуйааччыларыгар өбүгэ үтүө үгэс­тэригэр олоҕуран бары өттүнэн сайдыылаах уонна олоххо-дьаһахха бэлэмнээх, үлэһит ыччаты иитиигэ ситиһиини баҕарда.

Антонина Григорьеваны кытта интеллектуальнай оонньуу кыттыылаахтарын Саха Өрөспүүбүлүкэтин Быра­быыталыстыбатын бэрэссэдээтэлин солбуйааччы Денис Белозеров, Саха Өрөспүүбүлүкэтин үөрэххэ уонна наукаҕа миниистирэ Владимир Егоров, фермер хаһаайыстыбаларын уонна тыа хаһаайыстыбатын кооперативтарын Ассоциациятын Президенэ — экспердэрин сэбиэтин бэрэссэдээтэлэ Александр Артемьев, Дьокуускайдааҕы тыа хаһаайыстыбатын техникумун дириэктэрэ Андрей Самсонов эҕэрдэлээтилэр.
Куонкурус чэрчитинэн өрөспүүбүлүкэ агрооскуолаларын быыстапката үлэлиир. Күн устата хамаандалар биэс түһүмэҕи ааһаллар. Бизнес-идеяларын көмүскүүллэр, экспердиир сэбиэт ыйытыытыгар хоруйдууллар, реклама плакаттарын билиһиннэрэллэр, бэдэрээлинэй сокуон туттуллар түбэлтэтигэр хайдах дьаһанар туһунан ырытыһаллар, итиэннэ бизнес-былаан, менеджмент, агро-бырамыысыланнас эйгэтигэр бырагыраамаларга уонна нормативнай докумуоннарга сыһыаннаах эрдэттэн бэлэмнэммит ыйытыыларга хоруйдууллар.
Интеллектуальнай оонньуу түмүгүнэн маннык номинациялар туттарыллыахтара: «Бастыҥ ураты бырайыак», «Хамаанда бастыҥ хапытаана», «Хамаанда бастыҥ оонньооччута», «Дуэльга бастыҥ ыйытыы», «Быыстапка бастыҥ экспозицията», «Саамай эдэр кыттааччы», «Бастыҥ рекламалыыр плакат», «Сыл бастыҥ бизнес-бырайыага», «Бырайыагы үчүгэйдик арыйбыкка», «Кыайыыга дьулуурун иһин».