Саха сирин этиилэрэ сокуон барылыгар учуоттаннылар

От ыйын 24 к. Госдумаҕа “Россия Федерациятыгар үөрэхтээһин туһунан” Федеральнай сокуоҥҥа уларытыылары киллэрии туһунан” 438863-7 №-дээх сокуон барыла (Россия Федерациятын норуоттарын тылларын уонна РФ састаабыгар баар өрөспүүбүлүкэлэр судаарыстыбаннай тылларын ахсааныттан төрөөбүт тылы үөрэтии чааһыгар) көрүллэн, иккис ааҕыыга ылылынна. Сокуон барылын бастакы ааҕыыга 2018 с. бэс ыйын 19 к. ылыммыттара.
Бу сокуон барыла улахан кэпсэтиини таһаарбыта уонна өрөспүүбүлүкэ уопсастыбаннаһыгар киэҥ дьүүллэһиини ааспыта. Ил Түмэн бэс ыйын 8 к. пленарнай мунньаҕар сокуон барылыгар көннөрүүлэри киллэрэргэ этиллибитэ. Парламент спикерэ Александр Жирков дьаһалынан СӨ Судаарыстыбаннай Мунньаҕын этиилэрин бэлэмниир бөлөх тэриллибитэ. Манна салайааччынан норуот депутата Егор Жирков анаммыта. Саха сирин бэрэстэбиитэллэринэн буолар Госдума депутаттарыгар уонна сенатордарга өрөспүүбүлүкэ парламенын көннөрүүлэрин өйүүллэригэр этиилээх суруктар ыытыллыбыттара. Ол курдук, бииргэ үлэлээһин түмүгэр, сокуон барылын иккис ааҕыыга ситэрии кэмигэр, Россия Федерациятын субъектарын сокуону таһаарар уорганнарыттан Ил Түмэн соҕотоҕун үс көннөрүүнү киллэрбитин Госдума үөрэххэ уонна наукаҕа кэмитиэтэ учуоттаабыта.
Онон Саха сирин парламенын этиилэрин Москваҕа иһиттилэр. Сокуон саҥа редакциятыгар СӨ Судаарыстыбаннай Мунньаҕынан туруоруллубут бары сүрүн стратегическай балаһыанньалар учуоттаналлар.
Иккис ааҕыыга ылыллыбыт сокуон барылыгар проблемалаах түгэннэр болҕомтоҕо ылылланнар, төрөөбүт уонна судаарыстыбаннай тыллары үөрэтии федеральнай судаарыстыбаннай үөрэх стандартарынан сүрүннэнэрэ сокуонунан бигэргэтиллэр дэнэр. Билиҥҥи сокуон барылынан, кинилэр үөрэтэр бырагыраамалар булгуччулаах чаастарыгар бааллар. Ону сэргэ үөрэх тылын көҥүл талыы олохтонор.
Куоластааһын түмүгүнэн сокуон барыла иккис ааҕыыга баһыйар үгүс куолаһынан ылылынна.
Госдума үөрэххэ уонна наукаҕа кэмитиэтин баһылыга Вячеслав Никонов пленарнай мунньахха сокуон барылын билиһиннэрэн, бастакы ааҕыы түмүгүнэн ылыллыбыт Госдума уурааҕар төрөөбүт тыллары өйүүр Фонданы тэрийэр туһунан боппуруоһу көрөргө этиллибитин санатта. «Туһааннаах кэпсэтиилэр ыытылыннылар, дуогабардар ситиһилиннилэр, онон биһиги Россия Федерациятын Президенин Ыйааҕынан ити фонданы тэрийэргэ, ол аата туһааннаах федеральнай үбүлээһиннээх президент фондатынан оҥорорго этии киллэрэбит. Оччоҕуна төрөөбүт тылынан үөрэх кинигэлэрин, үөрэх бырагыраамаларын оҥорор, төрөөбүт тылларга исписэлиистэри бэлэмниир, научнай чинчийиилэри ыытар кыаллыаҕа», — диэн кэпсээтэ депутат.
«Итини таһынан, биһиги уураахха төрөөбүт тыллары үөрэтии концепциятын үөскэтии наадалааҕын туһунан суруйбуппут. Дума уурааҕын көрүү түмүктэринэн РФ Бырабыыталыстыбатын сорудахтарын кэрискэтигэр ити концепцияны оҥорууга үлэлиир анал бөлөҕү тэрийии номнуо көрүллүбүтэ, ол концепцияҕа олоҕуран саҥа федеральнай судаарыстыбаннай үөрэх стандартарын уонна саҥа үөрэх былааннарын туһунан этиилэр оҥоһуллуохтара», — диэн иһитиннэрдэ Вячеслав Никонов.
Бүгүҥҥү күҥҥэ “Россия Федерациятыгар үөрэхтээһин туһунан” Федеральнай сокуоҥҥа уларытыылары киллэрии туһунан” сокуон барылын Россия Федерациятын норуоттарын тылларын уонна Россия Федерациятын састаабыгар баар өрөспүүбүлүкэлэр судаарыстыбаннай тылларын ахсааныттан төрөөбүт тылы үөрэтии чааһыгар аналлаах пууннарыгар үлэ салҕанар.