24 октября 2016 в 09:30

Сири босхо ылыыга Уһук Илин олохтоохторуттан 5,5 тыһыынча кэриҥэ сайабылыанньа киирдэ

Уһук Илиҥҥэ гектар сири ыларга билиҥҥи туругунан уопсайа 5,5 тыһыынча сайаапка киирдэ. Итинтэн 800 сайабылыанньа кадаастыр учуотугар турар. Ити туһунан суруналыыстарга Росреестр салайааччыта Виктория Абрамченко эттэ.

«Сир төһө табыгастааҕыттан көрөн дьон араас хайысханы толкуйдуур. Тыа хаһаайыстыбатынан дьарыктаныы инники кирбиигэ турар», — диир кини.

Сайабылыанньаны биэрии судургута, сири биэриигэ аккаас төрүөтэ кыччааһына интэриэһи өссө ордук күүһүрдэрин «Новости» РИА тиэрдэр.

Бэс ыйын 1 күнүттэн саҕаламмыт бастакы түһүмэххэ боруобаланар сирдэргэ учаастак бэриллибитэ. Оттон иккискэ – алтынньы 1 күнүттэн Уһук Илин регионнарын олохтоохторо бэйэлэрин субъектарыгар сир ылар туһунан сайабылыанньаны биэрэр кыахтаммыттара. 2017 сыл олунньу 1 күнүттэн Арассыыйа олохтоохторугар барыларыгар маннык быраап бэриллэр.

СИА.