786
10 ноября 2017 в 11:48
Снайпер Иван Кульбертинов төрөөбүтэ 100 сыла туолла
Сэтинньи 7 к., Улуу Өктөөп өрөбөлүүссүйэтин 100 сыла туолуутугар, Суорун Омоллоон аатынан Опера уонна балет театрыгар Аҕа дойду Улуу сэриитин кыттыылааҕа, номоххо киирбит снайпер Иван Николаевич Кульбертинов төрөөбүтэ 100 сылыгар аналлаах уопсастыбаннас мунньаҕа буолла.
Опера уонна балет театрын фойетыгар “Саха сирин снайпера И.Н. Кульбертинов” диэн быыстапка көрдөрүлүннэ, манна кини хаартыскалара, тутта сылдьыбыт маллара, ону сэргэ кинигэлэр, “Оружие Победы” экспозиция бааллар.
Иван Кульбертинов үбүлүөйүн бэлиэтиир тэрээһиҥҥэ мустубут дьону Ил Түмэн Бэрэссэдээтэлин бастакы солбуйааччы Анатолий Добрянцев, СӨ Бырабыыталыстыбатын Бэрэссэдээтэлин солбуйааччы Михаил Гуляев, СӨ байыаннай комиссара Демир-Оол Артына, Иван Кульбертинов уола Иван Кульбертинов, Өлүөхүмэ оройуонун баһылыга Виктор Васильев, СӨ табаһыттарын Ассоциациятын бэрэссэдээтэлэ, “Тээнэ” төрүт-уус община баһылыга Арсентий Николаев, Россия ох саанан ытыыга үтүөлээх маастара, XIV сайыҥҥы Паралимпийскай Оонньуулар боруонса призердара, Европа уонна аан дойду рекордсменката Степанида Артахинова эҕэрдэлээтилэр.
Үөрүүлээх мунньаҕы аһарыгар Бырабыыталыстыба Бэрэссэдээтэлин солбуйааччы Михаил Гуляев Дьокуускай куорат биир уулуссатыгар Иван Кульбертинов аата иҥэриллиэҕин итиэннэ кини аатын үйэтитиигэ тутаах суолтаны өрөспүүбүлүкэ киин куоратыгар 2018 сылга снайпер боруонса пааматынньыгын туруоруу ылыаҕын бэлиэтээтэ.
Ил Түмэн спикерин бастакы солбуйааччы Анатолий Добрянцев аатырбыт снайпер аймахтарын уонна биир дойдулаахтарын эҕэрдэлээтэ, Иван Николаевич Кульбертинов – эбэҥки норуотун уһулуччулаах уола, табаһыт, булчут, биһигини сөхтөрөр ураты киһи буоларын эттэ.
«Иван Кульбертинов бэргэнник ытарга уонна саһарга оҕо сааһыттан тайҕаҕа бултуу сылдьан үөрэммитэ», – диэтэ Анатолий Добрянцев.
Иван Кульбертинов, Саха сирин элбэх омуктаах норуотун уос номоҕор сылдьар бэрэстэбиитэлин аата фашистарга улахан кутталынан буолбутун вице-спикер ыйда. Ону сэргэ уһулуччулаах снайпер Аҕа дойду Улуу сэриитигэр дьоруойдуу быһыыта гражданин эппиэтинэһин уонна төрөөбүт сиргэ таптал, эр санаалаах уонна хорсун буолуу холобурунан көстөрүн бэлиэтээтэ. Иван Кульбертинов олоххо сыһыана уонна үлэтэ Ийэ дойдуга, бэйэ норуотугар бэриниилээх, муҥура суох тапталынан сулууспалааһын бастыҥ холобура буолар, онтон киэн туттуу уонна сөҕүү үөскүүр.
Тэрээһин кыттыылаахтарыгар анаан Иван Кульбертинов туһунан композицияны П.А.Ойуунускай аатынан Саха академическай театрын артыыстара көрдөрдүлэр.
