807
01 декабря 2017 в 14:43
«Союз-2.1» ракета чаастарын бөртөлүөтүнэн көрдөөһүн саҕаланна
СИА иһитиннэрбитинэн, “Союз-2.1” ракета иккис сүһүөҕүттэн арахсыбыт 4 чаастара Бүлүү улууһун Үгүлээт нэһилиэгиттэн 70-100 км сиргэ баар буолуохтарын радар хабан ылла. Исписэлиистэр бөртөлүөтүнэн ити сиргэ бастакы көтүүлэрэ сэтинньи 30 күнүгэр саҕаланна.
Ыйыллыбыт чаастар, эрдэттэн былааннаммытын курдук, Бүлүү улууһугар түһүөхтээх оройуоннарын киин өттүгэр түспүттэрэ билиннэ. Радар түөрт объект баарын көрдөрдө. Бэҕэһээ Ми-8 бөртөлүөт ракета чаастара түспүт миэстэлэригэр көттө, онно боруоба ылыллыаҕа уонна экологическай мониторинг ыытыллыаҕа.
Экипаж састаабыгар «Роскосмос», Саха сирин айылҕа харыстабылыгар министиэристибэтин, Ньурбатааҕы аналитическай экспертиза — РИАЦЭМ ГБУ, РНА СС уу уонна экология проблемаларын институтун үлэһиттэрэ, Бүлүү улууһун бэрэстэбиитэллэрэ, уопсастыбанньыктар, о.д.а. бааллар. Чинчийии кэннэ чаастары “Роскосмос” уонна авиалесоохрана үлэһиттэрэ тиэйиэхтэрэ.
Манна даҕатан эттэххэ, “Восточнай” космодромтан сэтинньи 28 к. көтүтүллүбүт «Союз-2.1б» ракета космоска «Метеор-М» спутнигы итиэннэ онно эбии научнай уонна технологическай аналлаах 18 кыра космическай аппарааты таһаарыахтааҕа. Кинилэр көппүттэрэ уонна – сүтэн хаалбыттара.
«Роскосмос» ракета “Фрегат” блогар саахал тахсыбытын бигэргэттэ. «Метеор-М» спутник саахалламмытын төрүөтүнэн киһи сыыһата буолуон сөп диэн сабаҕаланар.
