Судаарыстыбаннай уоргаҥҥа үлэлиир туох ордуктааҕый?

HeadHunter хампаанньа чинчийиилэри ыытар сулууспата Саха сиригэр эдэр үлэни көрдөөччүлэр ортолоругар судаарыстыбаннай уорганнарга үлэҕэ кинилэр туох сыһыаннаахтарын билэр сыалтан ыйытык оҥордо.

Кэнники 3 сылга судаарыстыбаннай уорганнарга үлэлиир эбэтэр үлэлиир баҕалаах эдэр дьон ылар өлүүтэ 2 төгүл аҕыйаабыт: 2016 сылга 40%-тан 2019 сылга 18% диэри. Ити сүнньүнэн фриланска (сакааһынан) үлэлиир эбэтэр үлэлиэн баҕалаах (7%-тан 17% диэри), ону сэргэ коммерческай хампаанньаҕа наймыласпыт (35%-тан 38% диэри) уонна предприниматель быһыытынан (12%-тан 18% диэри) үлэлиир дьон ылар ирээтэ улааппытынан быһаарыллар.
Коммерческай хампаанньаҕа наймылаһан үлэлиирин ордорор дьон 41% норуоттар икки ардыларынааҕы хампаанньа Россиятааҕы салаатыгар үлэлиэн баҕарар; ити дьонтон 88% хампаанньа омук сиригэр баар офиһыгар үлэлииллэригэр этии оҥордохторуна, ону ылыныахтарын этэллэр. Сыччах 15% Россия хампаанньатын ордоруохтара, 35% кинилэргэ хампаанньа региона суолтата суоҕун ыйдылар.
Оттон наймылаһан үлэлииртэн бизнеһи ордорор эдэр дьон 39% Россияҕа бэйэ дьыалатын аһыан баҕарар, 25% атын дойдуга бизнескэ үлэлиир баҕалаахтар, 28%-гар — хайата да син биир.
Эдэр үлэ көрдөөччүлэр судаарыстыбаннай уорганнарга үлэлиир туох ордуктааҕын быһыытынан туруктаах уонна бастайааннай буолууну (54%), карьераны оҥостор кыаҕы (36%), үлэ үрдүк статуһун уонна кэрэхсэбиллээҕин (30%) итиэннэ уопсастыба туһатыгар үлэлиир кыаҕы (30%) 3 сыл анараа өттүнээҕиттэн (туһааннааҕынан 71%, 54%, 46% уонна 48%) быдан аҕыйахтык бэлиэтээтилэр.
Туруктаах уонна бастайааннай буолуу 2016 сылга үтүө өрүттэргэ бастакы миэстэни ылара, быйыл ону судаарыстыбаннай сулууспаҕа бириэмийэ, араас чэпчэтии уонна социальнай пакет баарын кытта сибээстээх пуун солбуйда (57%, 2016 сылга — 63%). Итэҕэстэр ортолоругар эдэр дьон судаарыстыбаннай сулууспаҕа үлэлии киирэр уустугун (59%, 2016 сылга — 65%), коррупцияны (56%, 2016 сылга — 47%), карьераны оҥостор туһугар сибээстэр ирдэнэллэрин (56%, 2016 сылга — 45%) бэлиэтээтилэр.
Судаарыстыбаннай сулууспаны ордорор эдэр дьоҥҥо билигин үлэлиир федеральнай миниистирдэртэн саамай холобур буолуох киһинэн оборона миниистирэ Сергей Шойгу (33%) буолар. Иккис миэстэҕэ омук дойдуларын дьыалаларыгар миниистир Сергей Лавров (25%) таҕыста. 24% билигин үлэлиир миниистирдэртэн кинилэргэ холобур буолар киһи суоҕун бэлиэтииллэр.

HeadHunter пресс-сулууспатын матырыйаалынан