21 декабря 2018 в 13:06

Табаһыттар хамнастарын — үлэ төлөбүрүн алын кээмэйигэр диэри

Саха сиригэр табаһыттар хамнастара үлэ төлөбүрүн алын кээмэйин таһымыгар (МРОТ) диэри үрдэтилиннэ, диэн соторутааҕыта “Арктика: Бүгүҥҥүтэ уонна кэскилэ” форумҥа Саха сирин бырабыыталыстыбатын бэрэссэдээтэлин солбуйааччы Денис Белозеров иһитиннэрдэ.

«Бюджет үбүн суотугар табаны иитиигэ туһааннаах ороскуоттар толуйуллаллар, онно хамнаһы үрдэтии, сэби-сэбиргэли, анал таҥаһы атыылаһыы киирэллэр. Бүгүҥҥү күҥҥэ Саха сирин Хоту өттүгэр табаһыттарга МРОТ 31 256 солк. тэҥ. Бюджеты чопчулааһыҥҥа (2018 сылга) ити суума көрүллүбүтэ. Кэлэр сылтан биһиги бюджеты былааннааһыҥҥа табаһыттарга МРОТ сууматын тутуһуохпут», — диэтэ кини.
Бу иннинэ РФ Президенэ Владимир Путин МРОТ айах ииттэн олоруу алын кээмэйигэр, урут былааннаммытынан, 2019 сыл тохсунньу 1 күнүттэн буолбакка, 2018 сыл ыам ыйын бастакы күнүттэн ыла тиэрдиллиэҕэ диэбитэ. Судаарыстыба баһылыга МРОТ индексациялана туруоҕа уонна айах ииттэн олоруу алын кээмэйиттэн аллараа түһүө суоҕа диэн бэлиэтээбитэ. РФ Үлэҕэ министиэристибэтин сыанабылынан, 2018 сыл ыам ыйын 1 күнүттэн үлэ төлөбүрүн алын кээмэйин айах ииттэн олоруу алын кээмэйин таһымыгар диэри үрдэтиигэ бюджет бары таһымнарыттан барыта 39,3 млрд солк. ирдэнэрин туһунан ТАСС сигэнэн, СИА иһитиннэрбитэ.