Учуобунньук хаачыстыбатыгар ким эппиэттиэҕэй?

Ол курдук, начаалынай кылаас учууталлара учуобунньуктарга олус элбэх научнай термин баарын, оҕолор ону өйдөөбөттөрүн этэллэр. Ол эрэн, ити “сибэккитэ” эрэ. Депутат Любовь Духанина  кэпсээбитинэн, “биир оҕо эбэтэ бастакы кылааска үөрэнэр сиэнигэр куобахтар тустарынан кэпсээни ааҕарыгар сорудах биэрбиттэрин эппит. Кэпсээҥҥэ куобахтар мустан баран дьүүллэспиттэр: олохторо олус ыараабыт, бары кинилэри сиэхтэрин баҕараллар. Сүбэлэһэн баран, олохторун тухары куттанан титирэстии сылдьыахтарынааҕар, билигин өлбүппүт ордук диэн, ууга түһэргэ быһаарыы ылыммыттар”. Ити “үөрэтэр” историяны, баҕар, оҕо төрөппүттэрэ кулгаахтарын таһынан аһарыахтара эбитэ буолуо. Ол эрээри оҕо тииһэ ыалдьыбытыгар, сонно тута стоматологка барар кыһалҕа тирээбит. Онуоха кыра кыыс “тиистэн эрэйдэммиттээҕэр, биирдэ өлбүт ордук” диэн турбут.

Онон депутат үөрэх кинигэтэ итинник бөрүкүтэ суох ис хоһоонноох эбит буоллаҕына, кинилэргэ экспертиза мөлтөҕүн этэр. Үөрэх уонна наука миниистирин солбуйааччы Павел Зенькович ыйыллар сыанабылы үбүлээһин бэрээдэгин уларытарга этиилээх. Кини: “Билигин учуобунньуктар экспертизаларын сакаасчыт бэйэтэ төлүүрэ олохтонон турар. Ити сыанабыл сөптөөҕөр саарбахтатар”, – диэтэ. Онон чунуобунньук экспертизаны судаарыстыба үбүн суотугар төлөөһүн боппуруоһугар төннөргө ыҥырар.

Экспертизаны ыытар кэмҥэ тахсыбыт алҕастар иһин эппиэтинэс билиҥҥи сокуоннарга көрүллүбэт. Духанина этэринэн, оскуолаҕа туһаныллар үөрэх кинигэтин ааптардарыгар да, үөрэх соруктарыгар сөп түбэһэрин сыаналыыр экспердэргэ да тус эппиэтинэстэрэ үрдүөх тустаах. “Экспертиза түмүктэрэ аһаҕас, экспертизаны ыыппыт дьон ааттара-суоллара, дуоһунастара, тэрилтэлэр ааттара биллэр буолуохтаахтар, – диир парламентарий. – Оччоҕуна  учуобунньук тахсарыгар сөбүлэспит киһиттэн ыйытар кыаллыа этэ”.

Кини үөрэх туһунан федеральнай сокуоҥҥа баччааҥҥа диэри “оскуола учуобунньуга” диэн өйдөбүл суоҕун бэлиэтээтэ.