20 июля 2018 в 12:43

Япония хампаанньалара муоста тутуутун сэргииллэр

Япония икки хампаанньата «Мицуи» уонна «Комаихалтек Инк» Өлүөнэ өрүһү туоруохтаах муоста тутуутун сэргээтилэр. “Мицуи” бырайыактыыр департаменын салайааччыта Коносукэ Суги иһитиннэрбитинэн, кинилэр Япония салалтатын өттүттэн үбүнэн көмөнү ыларга эрэнэллэр.

Саха сирин бырабыыталыстыбатын бэрэссэдээтэлин бастакы солбуйааччы Алексей Колодезников «Мицуи» хампаанньа бэрэстэбиитэллэрин кытта көрсүһүүтүгэр бииргэ үлэлээһин туһунан боппуруостары, чуолаан Өлүөнэ өрүһү туоруур муоста тутуутун дьүүллэстилэр, итиниэхэ билигин Тиксиигэ тыал көмөтүнэн үлэлиир генераторы туруоруунан дьарыктанар «Комаихалтек Инк» эмиэ интэриэстээх.

«Биһиги чинчийиини өйөөһүҥҥэ, чуолаан барыллааһын бырайыактааһыҥҥа, үөрэтиигэ уонна бырайыакка сметаны оҥорууга анаан Япония экономикаҕа, эргиэҥҥэ уонна бырамыысыланнаска министиэристибэтиттэн харчы көрдүөхпүтүн баҕарабыт», — диэтэ тойон Коносукэ Суги.

Бу үлэ чэрчитинэн Саха сирин өттүттэн араас дааннайдар ирдэниэхтэрин сөп: муоста сүрүн көрдөрүүлэрэ, тутуу болдьоҕо уо.д.а. диэн бэлиэтээтэ кини. Региоҥҥа муоста суолталааҕын бэлиэтээн, Колодезников наадалаах иһитиннэрии болдьоҕор бэлэмнэниэҕин туһунан хоруйдаата: «Биһиэхэ бу бырайыак олус суолталаах. Онон 2019 сылга ити докумуоннар бэлэм буолалларын итиэннэ үлэ саҕаланарын туһугар, биһиги бырайыак докумуоннарын кылгас болдьоххо оҥорор санаалаахпыт».

Кини эбэн эппитинэн, от ыйын 20-21 күннэригэр Дьокуускайга Өлүөнэ нөҥүө муостаны тутуу боппуруостарыгар научнай конференция буолуохтаах, онно «Комаихалтек Инк» уонна «Мицуи» бэрэстэбиитэллэрэ эмиэ кыттыахтара.

Санаайа Иванова, СИА.