Үөһээ Бүлүү кыра нэһилиэктэрэ оскуолалаах буолуохтара

«Үөһээ Бүлүү» хаһыат редакцията иһитиннэрбитинэн, үөрэх салаатыгар үөрүүлээх сонуннар кэлэн, ордук кыра оскуолалаах тыа сирин нэһилиэктэрэ бу күннэргэ сэргэхсийэн, өрөгөйдөөн олороллор. Маннык тыҥааһыннаах, киирсиилээх, аҕыйах ахсааннаах оҕолоох оскуолаларга сүһүөхтэри сарбыйыы, оҕо уһуйааннарын холботолоон биир юридическай сирэй оҥоруу курдук боппуруостар ыган турдахтарына, чахчы туруулаһан туран, күүстээхтик көмүскээн, Үөһээ Бүлүү Балаҕаннаах, Хомустаах, Быракаан нэһилиэктэрин оскуолалара “сайдар кэскиллээх нэһилиэктэр” диэн 9 кылааһынан хаалар буоллулар.

Үөһээ Бүлүү улууһун киинигэр 1, 9 №-дээх оҕо уһуйааннара холбоһор буоллулар. Боотулуу, Далыр, Дүллүкү, Кэнтик, Хоро нэһилиэктэрин оскуолалара, оҕо уһуйааннара оннунан хааллылар. Маҥаас, Өргүөт, Ороһу, Оҥхой, Сургуулук, Туобуйа, Быракаан, Тамалакаан, Мэйик, Кырыкый оскуола иннинээҕи тэрилтэлэрэ оскуолаҕа холбонуохтара. Эбии үөрэхтээһиҥҥэ икки спорт оскуолата, «Тускул» оҕо сайдар киинэ, оҕо технопарката, Ороһу нэһилиэгэр баар Чиряев аатынан норуот педагогикатын киинэ хааллылар. Оскуолалар бырайыактарыгар оҕо уһуйааннара сыһыарыллыбыттарынан, бырайыактар былааннарыгар уларытыылары киллэрэргэ эттилэр.

СӨ Бырабыыталыстыбатын бэрэссэдээтэлэ В.В. Солодов кыттыылаах социальнай тэрилтэлэр ситимнэрин бэрээдэктээһин мунньаҕар Үөһээ Бүлүү улууһун баһылыга В. Поскачин, Ил Түмэн дьокутаата Ф. Габышева, баһылык солбуйааччыта Н. Гурьева, үөрэх управлениетын салайааччыта С. Борбуев, спорт управлениетын салайааччыта В. Петров, Быракаан нэһилиэгин баһылыга А. Оконосов, Быракаан оскуолатын дириэктэрэ А. Саввинова уонна үөрэх, спорт, культура управлениеларын экономистара кытыннылар.

Билиҥҥи туругунан, Тамалакаан оскуолатын директорын С. Федоровы кытта Үөһээ Бүлүү улууһун үөрэҕин салаатын салайааччыта С. Борбуев оскуола уонна оҕо уһуйаанын тэрилтэлэрин холбоһуутун туһунан дьыалабыай көрсүһүү ыытта, ону таһынан саҥа оскуола-саад дьиэтин тутуутун туһунан кэпсэттэ.

Спиридон БОРБУЕВ, Үөһээ Бүлүү улууһун үөрэҕин салаатын салайааччыта:

—  Үөһээ Бүлүү улууһун баһылыга Владимир Поскачин улууска ситими бэрээдэктиир үлэ сыллата барарын тоһоҕолоон бэлиэтээтэ, кэлиҥҥи сылларга ханна туһааннааҕынан көрөн тэрилтэлэри эбии, кыччатыы улууска барбытын ыйда. Кыра нэһилиэктэр оскуолалара сабыллыа суохтаахтарын Куду, Күүлэт, Көтөрдөөх холобуругар эттэ. Дакылаатыгар сүрүн болҕомтону Быракаан оскуолатын сүһүөҕүн кыччаппаттарыгар уурда. Бу нэһилиэккэ быйыл биир оҕо бүтэрбит буоллаҕына, эһиил 7 оҕо киирэр. Кэлэр сылларга бу сыыппара улаханнык хамсаабат. 2014 сыллаахха саҥа оҕо саада үлэҕэ киирбитэ, былырыын учууталлар дьиэлэрэ ситэриллибитин, быйыл эмиэ учууталларга дьиэ тутуута барыахтааҕын ыйда. Кэлиҥҥи сылларга нэһи­лиэккэ саҥа дьиэлэр тутуулара үксээтэ, дьон сылгы, сүөһү иитиитинэн күүскэ дьарыктанан эрэрин эттэ.

Владимир Солодов үөрэх, культура, спорт, доруобуйа харыстабылын миниистирдэрин, баһылык этиилэрин истэн баран хамыыһыйа аатыттан улууска биир даҕаны оскуола кыччыа, сабыллыа суохтааҕын эттэ. Маннык үлэлэр улууска урут да барбыттара, быйыл баҕа өттүнэн Тамалакааҥҥа холбостулар. Чугас­тыы Нам нэһилиэгин оскуолата интернаттаах. Ороһу оскуолатын оҕо саадын кытары холбоон тутуллуохтаах оскуола бырайыагын уларыта охсон, аҥаара оскуола, аҥаара оҕо саада гынан эбэргэ кэрэхсэбиллээх этиини оҥордо. Эрдэ сүһүөхтэрэ сарбылларга былааннаммыт Балаҕаннаах, Хомустаах, Быракаан нэһилиэктэрин оскуо­лалара оннуларынан хаалар буоллулар.

Түмүккэ этиэҕи баҕарыллар, бэйэ кыаҕын билинэн, аһары утарсыбакка, элбэхтэ ааҕынан-суоттанан, бэрээдэктэнии үлэтин үөһэттэн ыйыыны күүппэккэ кэмиттэн кэмигэр ыыттахха улахан охсуута суох буоларын Владимир Семенович баһылыктаах улуус салалтата көрдөрдө.

Министиэристибэлэр, кэмитиэттэр мэлдьи нэһилиэк баһылыктарыгар аһаҕас буолуохтаахтар

Санатар буоллахха, Үөһээ Бүлүүтээҕи М. Алексеев аатынан лицей-интернат дириэктэрин солбуйааччы Туяра Блинова уонна Балаҕаннаах нэһилиэгин баһылыга Степан Дмитриев ыам ыйын 21 күнүгэр Өктөмҥө ыытыллыбыт Ил Түмэн “Тыа оскуолатын туруга уонна сайдыыта” диэн мунньаҕар кыттыыны ылбыттара, улууска социальнай инфраструктура объектарын ситимигэр, чуолаан үөрэхтээһин эйгэтигэр, сарбыйыыны таһаарбат туһунан күүстээхтик этиммиттэрэ, санааларын ылыннаран, мунньах түмүгүнэн ылыныллыбыт резолюцияҕа киллэттэрбиттэрэ.

Үөһээ Бүлүү Балаҕаннаах нэһилиэгин баһылыга Степан ДМИТРИЕВ мунньахха этиититтэн:
— Спиридон Олегович олох үчүгэйдик дакылаат оҥор­до. Үөһээ Бүлүү улууһугар биир да тыа нэһилиэгин оскуолатын ста­туһа кыччыа суоҕа диэн этиитин саала ытыс тыаһынан ылынна. Кини тыа нэһилиэгэр билигин үөрэнэр оҕолортон көрөн буолбакка, инники сайдыытын көрөн оскуола тутуохха диэн эттэ. Туобуйа, Хомустаах, Куду оскуолаларын тоһоҕолоон бэлиэ­тээбитин мунньах кыт­тааччылара сэргээтилэр. Туйаара Васильевна Блинова үчүгэй, толору дакылааты оҥорбутун сэҥээрдилэр. Дакылааттар кэннилэриттэн тыл этиибэр тыа сирин оскуолаларын харыстыыр үлэни ыытар наадатын ыйдым. Балаҕаннаах оскуолата Аҕа дойду сэриитин ыарахан кэмнэригэр аһыллыбытын, 2019 сылга 75 сыллаах үбүлүөйүн бэлиэтиирин, маны таһынан тыа сиригэр оскуолалар статустарын кыччатыы нэһилиэктэр социальнай, экономическай олохторугар улахан охсууну оҥорор туруктааҕын туһунан этинним. Саха улуу уола Исидор Бараахап бэйэтин кэмигэр Лебедеви, Агеевы, Козловы туоратан, саха аймаҕы, ордук Хаҥалас, илин эҥээр улуустарыгар үрүҥ хамсааһыҥҥа кыттыспыт дьоҥҥо амнистия оҥорон быыһаабытын санаттым. Онон биһиги Ил Түмэммит дьокутааттара тыа дьонун туһугар тыа оскуолаларын кыччаппат туһугар үлэлэрин бэлиэтээн туран, инники үлэлэригэр ситиһиини баҕардым. Бырабыыталыстыба дьаһалларын олоххо киллэрээччинэн нэһилиэктэр баһылыктара буолалларын тоһоҕолоон туран, министиэристибэлэр, кэмитиэттэр ааннара мэлдьи нэһилиэк баһылыктарыгар аһаҕас буолуохтаахтар диэн бэлиэтээтим.

«Үөһээ Бүлүү» хаһыат матырыйаалынан балаһаны бэлэмнээтэ

Василий ПРОКОПЬЕВ