Владимир Солодов: Өйөбүл дьаһаллара — дьадайыыны утары охсуһуу

«Биһиги элбэх оҕолоох ыал­лар олохторун уйгутун хааччыйар туһугар бары күүһү-уоҕу уурабыт. Кинилэри өйөбүл дьаһалларынан хааччыйыы дьадайыыны утары охсуһууну кытта быһаччы сибээстээх”, — диэтэ Владимир Солодов уонна федеральнай өйөбүл биир тутаах дьаһалынан сир учаастактарын биэрии буоларын эттэ.
Саха сирин үлэ­ҕэ уонна социальнай сайдыыга миниистирэ Елена Волкова дааннайдарынан, региоҥҥа 26174 элбэх оҕолоох ыал олорор – бу 3 уонна онтон элбэх оҕолоох ыаллар.
2018 сылга оҕолоох ыаллары өйөөһүҥҥэ өрөспүүбүлүкэҕэ 8 млрд 41 мөл. солк. ыытыллыбыт. Федеральнай бюджеттан өйөбүл социальнай дьаһалларыгар 885 мөл. солк. ыытыллар, демографияны өйөөһүн дьаһалларыгар – 214 мөл. солк. 2019 сыллааҕы судаарыстыбаннай бюджет барылыгар 2018 сылы кытта тэҥнээтэххэ, 300 мөл. солк. элбэх үп угулунна.
Элбэх оҕолоох ыаллары судаарыстыба өттүттэн өйөөһүн дьаһалларын ортотугар Елена Волкова өрөспүүбүлүкэтээҕи ийэ хапытаалын ааттаата – бу 139 тыһ. солк. уонна ааспыт сылга 1,5 төгүл үрдээбит оҕо босуобуйаларын төлөөһүн.
Елена Волкова иһитин­нэр­битинэн, өрөспүүбүлүкэ Үлэҕэ министиэристибэтэ национальнай бырайыак чэрчитинэн оҕо төрөөһүнүн ахсаанын улаатыннарыыга эбии дьаһаллар тустарынан сокуон барылын бэлэмнээтэ. Ол курдук, бастакы оҕо төрөөтөҕүнэ биир кэмнээх харчынан төлөбүр (ол кээмэйэ дьүүллэһиллэр) уонна иккис оҕо төрөөтөҕүнэ ийэ хапытаалын 30 % тэҥнээх харчынан төлөбүр, үһүс уонна онтон салгыы оҕолоро төрөөтөҕүнэ, 3 саастарын туолуохтарыгар диэри ый аайы төлөбүрү биэрии былааннаналлар.
Национальнай быра­йыак чэрчитинэн судаарыстыба өйөбүлүн эбии дьаһалларын үбүлээһиҥҥэ уопсай наадыйыы 2019 сылга 2 млрд 63 мөл. солк. тэҥ, ол иһигэр федеральнай бюджеттан – 2 млрд 6 мөл. солк., өрөспүүбүлүкэттэн кыттыгас үбүлээһин 57 мөл. солк. тэҥнэһиэхтээх.
Россия Үлэҕэ министиэристибэтигэр сөбүлэһэр быһаарыы ылыллар түгэнигэр, Саха сиригэр элбэх оҕолоох ыаллары өйөөһүн кээмэйэ 10 млрд 427 мөл. солк. тэҥ буолуоҕа.
Архитектура уонна тутуу комплексын миниистирэ Павел Аргунов иһитиннэрбитинэн, элбэх оҕолоох ыалларга анаммыт сир учаастактарын инфраструктуранан хааччыйыы бэрээдэгэ уларыйбытынан, бастатан туран, уотунан хааччыйыахтара уонна суолу тутуохтара, ол учаастактары туһаҕа киллэриигэ сабыдыаллыаҕа.
Өрөспүүбүлүкэ улуустарыгар инфраструктуралаах сир учаас­тактарын баһылааһын намыһах. Суолунан, гааһынан уон­на сылааһынан хааччыллыбыт 1,5 тыһыынча учаастактан аҥаарыттан аҕыйаҕа туһаҕа киирбит.
Манан сибээстээн Владимир Солодов туһааннаах министиэ­ристибэлэргэ элбэх оҕолоох ыалларга анаммыт учаастактар уопсай ахсааннарын уонна муниципалитеттар истэринэн наадыйыыны, баһылааһын бырыһыанын уонна инфраструктуранан хааччыллыыны ырытарга, муниципальнай тэриллиилэр эппиэтинэстэрин күүһүрдэргэ сорудахтаата.
Учаастактары туһаҕа таһаарбакка эрэ, инфраструктуранан толору хааччыйыы табыллыбат балаһыанньа диэн туран, кини суол тутуутуттан уонна уоту тардыыттан саҕалыыр наадатын, кыбартааллар төһө тутуллалларыттан көрөн гааһынан, сылааһынан хааччыйыы барыах­тааҕын бэлиэ­тээтэ.

СӨ Ил Дарханын уонна Бырабыыталыстыбатын
пресс-сулууспатын матырыйаалынан Елена БАИШЕВА бэлэмнээтэ.
Василий Прокопьев инфографиката.