«Чысхааннар» ситиһиилэрэ

Дойдуга хайыһарга барыта 150 спортивнай кулууп баара биллэр. Россия Кубогар итинтэн 21 кулууп кыттыыны ылла. Бу күрэхтэһиигэ биһиги өрөспүүбүлүкэбит чиэһин биэс сыл анараа өттүгэр тэриллибит «Чысхаан» кулууп көмүскээтэ. Кулууп салайааччытынан үһүс ыҥырыылаах Ил Түмэн депутата Екатерина Никитина үлэлиирин бэлиэтиибин.
Үс күннээх күрэхтэһии түмүгүнэн «Чысхааннар» иккис бириистээх миэстэҕэ тахсаннар, кыттааччылары соһуттулар. Олохтоохтор, Свердловскай уобалас спортивнай кулууба кыайыы кынаттанна. Үһүс бириистээх миэстэҕэ Москва «Лесная» спортивнай кулууба тигистэ.
Саастарынан араарыллыбыт бөлөхтөргө чемпионнарынан биир дойдулаахтарбыт Степан Абрамов (81 саастаах), Василиса Слепцова (68 саастаах), Валентина Саввина (63 саастаах), призердарынан Екатерина Павлова, Николай Захаров, Максим Колодезников, Екатерина Никитина буоллулар. «Чысхаан» спортивнай кулууп барыта 13 мэтээлгэ тигистэ.

Бу күрэхтэһии кэнниттэн «Чысхааннар» Татарстаҥҥа Заинскай куоракка хайыһарынан сөбүлээн дьарыктанааччылар Россиятааҕы күрэхтэһиилэригэр кытта көппүттэрэ. Күрэхтэһии кулун тутар 14-18 күннэригэр ыытылынна. Манна дойду 35 регионуттан 248 хайыһардьыт кыттыыны ылла.
Илин-кэлин түсүһүүлээх күрэхтэһии түмүгүнэн биһиги өрөс­пүүбүлүкэбит спортсменнара 35 хамаандаттан сэттис миэстэни ылары ситистилэр. Хайыһар үгэннээн сайдыбыт Коми Өрөспүүбүлүкэтин, Удмуртияны, Свердловскай уобалаһы кэннилэригэр хаалларбыттарын бэлиэтиибин.
Хамаанда чилиэннэрэ бу сырыыга барыта 14 мэтээли (7 үрүҥ көмүс, 7 бронза) ылары ситистилэр. Биир дойдулаахтарбытын, аҕа саастаах спортсменнарбытын кыайыыларынан, ситиһиилэринэн истиҥник эҕэрдэлиибит.