Дьокуускайга — 8 дойду көҥүл тустууктара

Арслан Цеденсондном бэлиэтээ­битинэн, көҥүл тустууга Аан дойду кубогар кыттар Монголия сүүмэрдэммит хамаандатын састааба тохсунньу ыйга быһаарыллыбыт.
Номнуо нөҥүө күнтэн тустууктар эрчиллиини саҕалыахтара. Монголия хамаандатыгар саамай күүстээх бөҕөстөр киирбиттэр. Тренер көҥүл тустууга саха оскуолатын үчүгэйдик билэллэрин эттэ, кинилэр бастыҥ тустууктарын ортотугар аан дойду чемпионатын призера уонна Азиятааҕы оонньуулар чемпионнара Эрденебат Бехбаяры, аан дойду чемпионатын үрүҥ көмүс призера Унурбат Пуревжаввы ааттаата. Оттон хамаанда капитанынан уопуттаах бөҕөс Ганзориг Манданхаран буолар. “Биһиги сүрүн күрэстэһээччилэрбит – АХШ, Грузия, Иран уонна, саарбаҕа суох, Россия буолаллар», – диэн бэлиэтээтэ кылаабынай тренер.

Хамаанда капитана, аан дойду чемпионаттарын икки төгүллээх призера Ганзориг Манданхаран Монголия алтыс сылын Аан дойду кубогар кыттарын кэпсээтэ, кинилэр сыалларынан финалга Россия сүүмэрдэммит хамаандатын кытта көрсүһүү буоларын эттэ.
Бэлиэтээн эттэххэ, көҥүл тустууга Аан дойду кубога кулун тутар 16-17 күннэригэр буолуоҕа. Бу улахан күрэхтэһиини көҕүлээччинэн өрөспүүбүлүкэ баһылыга, СӨ спортивнай тустууга Федерациятын президенэ Айсен Николаев буолар.

Кулун тутар 13 к. Дьокуускайга көҥүл тустууга Аан дойду кубогар кыттар иккис хамаанда – Япония тустууктара Токиоттан Южно-Сахалинскай куорат нөҥүө көтөн кэллилэр.
Япония сүүмэрдэммит хамаандатын кылаабынай тренерэ Иноуэ Кендзи «Спорт Якутии» корреспонденын кытта кэпсэтиигэ 22 киһилээх кэлбиттэрин ол иһигэр 12 бөҕөс баарын бэлиэтээтэ. Хамаанданы Акаиши Косей салайар, эбии 2 тренер, икки судьуйа, быраас, массажист уонна фотограф бааллар. Ону сэргэ Япония спортивнай тустууга Федерациятын сэкирэтээрэ Татьяна Кога кэлсибит. Кулун тутар 14 к. өрөспүүбүлүкэ киин куоратыгар Аан дойду кубогын бочуоттаах ыалдьыттара, Японияттан олимпийскай чемпионнар Юдзи Такада уонна Хидаэки Томияма көтөн кэлиэхтэрэ.

Иноуэ Кендзи 2018 с. аан дойду чемпиона Такуто Отогуро доруобуйатын туругунан кыайан кэлбэтэҕин кэпсээтэ. Кини 65 кг диэри ыйааһыҥҥа тустуохтаах эбит. Тренер үс призердар истэригэр киирэр соруктаахтарын эттэ, сүрүн күрэстэһээччилэрин ортотугар Россия хамаандатын ааттаата. «Россия хамаандата – Аан дойду кубогар фаворит. Кини көбүөр хаһаайынын быһыытынан күрэстэһиэҕэ, оттон ити сүүнэ суолталаах», — диэтэ кини.

Япония хамаандатын лидеринэн аан дойду атын чемпионун, 57 кг диэри ыйааһыҥҥа тустуохтаах Юки Такахашины ааттыахха сөп. Кини Саха сиригэр аан бастаан кэлбит. Быйыл былырыыҥҥы ситиһиилэрин тупсарыахтаахтарын, Россияттан Арыйаан Тютрины кытта тустуохтааҕын этэр. Саха сириттэн тустууктар Японияҕа кыттыһан эрчиллиигэ кэлэ сылдьыбыттар, онно Такахаши Тютрины кытта тустубут, кинини үчүгэй техникалаах спортсменынан ааҕар.
Кулун тутар 14 күнүгэр Дьокуускайга көҥүл тустууга Аан дойду кубогын кыттыылаахтара уонна ыалдьыттара — Грузия, АХШ уонна Россия сүүмэрдэммит хамаандалара кэллилэр. Хаһаайыннар хамаандаларын састаабыгар төрөөбүт дойдуларыгар Саха сирин бөҕөстөрө Арыйаан Тютрин уонна Виктор Рассадин бааллар. Кинилэр “Триумф” спортивнай киин көбүөрүгэр Россия чиэһин көмүскүөхтэрэ.
Бу эппиэтинэстээх күрэхтэһии иннинэ “Спорт Якутии” кэрэспэдьиэнигэр сүүмэрдэммит хамаанда капттана Виктор Рассадин кылгас интервьюну биэрдэ.

«Хамаандабыт настарыанньата бэртээхэй, бары бойобуой туруктаахпыт. Алта аҥаар чаас көтөн кэллибит, ол эрээри онно үөрүйэхтээхпит. Сыал-сорук туһунан эбии саҥарар наадата суох дии саныыбын. Аан дойду кубогын тэрийэр хамаанда ханнык сыаллааҕын бары бэркэ өйдүүллэр.
Аан дойду кубогар хамаанда састаабын кылаабынай тренер Дзамболат Ильич Тедеев Сочига хомуурдар түмүктүүр түһүмэхтэригэр кулун тутар 8 к. биллэрбитэ. Саха сирин хамаандатыттан сборнайга Арыйаан Тютрин уонна мин киирдибит. Биһиги бэрэбиэркэ хас да кэрдииһин аастыбыт, Болгарияҕа норуоттар икки ардыларынааҕы турнирга кытынныбыт уонна хомуур кэмигэр хонтуруоллуур тустуулары ыыттыбыт. Олор түмүктэринэн хамаанда быһаарылынна.
Биһиэхэ хас биирдии ыйааһын категориятыгар иккилии бөҕөс туруоруллар, ханнык күөн көрсүүгэ ким тахсарын хамаанда кылаабынай тренерэ быһаччы быһаарыаҕа. Холобур, мин ыйааһыммар 65 кг диэри, биһиги иккиэбит: мин уонна Европа чемпиона Гаджимурад Рашидов. Биллэн турар, хамаандаҕа баар хас биирдии бөҕөс турнирга элбэхтик тустуон баҕарар, мин эмиэ онтон туораабаппын. Ону ааһан күүстээх утарсааччылары кытта бэйэ күүһүн тургутуоҕу баҕарыллар. Холобур, Японияттан аан дойду чемпионун кытта, ол эрээри кини Дьокуускайга кыайан кэлбэтэҕин истибитим. Ханнык да түгэҥҥэ биһиги ыйааһыммытыгар күрэстэһии үчүгэй буолуоҕа», — диэтэ Рассадин.
Кулун тутар 15 к. Кубаттан, Турцияттан, Ирантан тустууктар кэлиэхтэрэ.