703
02 марта 2018 в 10:18
Ил Түмэн хамаандата — иккис!
Парламент пресс-сулууспата иһитиннэрбитинэн, олунньу 24 күнүгэр «Стерх» спорт комплексыгар Саха Өрөспүүбүлүкэтин депутаттарын VII Спартакиадатын сабыы сиэрэ-туома ыытылынна. Бу күрэхтэри көҕүлээччинэн Саха Өрөспүүбүлүкэтин муниципальнай тэриллиилэрин олохтоох салайыныы бэрэстэбиитэллээх уорганнарын Ассоциацията уонна олохтоох салайыныы Бүтүн Россиятааҕы Сэбиэтин Саха сиринээҕи регионнааҕы салаата буолаллар.
Бэлиэтиир буоллахха, ааспыт икки Спартакиадаҕа Ил Түмэн хамаандата туруктаахтык 14-с миэстэҕэ сылдьыбыта. Быйыл дьэ дьиҥнээхтик өрө тахсыы буолла, ол курдук, өрөспүүбүлүкэ бар дьонун депутаттарын уонна Ил Түмэн иһинэн Ыччат парламенын чилиэннэрин түмсүүлээх, тэрээһиннээх хамаандата түөрт көрүҥ күрэххэ барытыгар үтүө түмүктэри көрдөрөн, 1-кы бөлөх улуустар уонна оройуоннар 12 хамаандаларын ортотугар 2018 сыллааҕы Спартакиадаҕа иккис бириистээх миэстэҕэ тахсыан таҕыста.
Күрэстэһии иккис күнүгэр хамаандалар волейбол плей-офф сериятыгар, ону сэргэ дартска, уһуну ойууга уонна баскетбол мээчигин корзинаҕа быраҕыыга тургутустулар. Санатар буоллахха, Ил Түмэн волейболистара Спартакиада бастакы күнүгэр бөлөхтөрүгэр бэйэлэригэр да соһуччу 1 миэстэни ылан, плей-офф серияҕа таҕыстылар. Оонньуулар түмүктэринэн хамаанда волейболга 6-с дьоһун миэстэлэннэ.
Салгыы парламентарийдар дартс (2 миэстэ) көрүҥэр уонна баскетбол мээчигин быраҕыыга (1 миэстэ) инники күөҥҥэ тахсан, кыайыы өрөгөйүн биллилэр. Оттон уһуну ойууга 8-с түмүгү көрдөрдүлэр, ол да буоллар “үрүҥ көмүс” миэстэни хааччыннылар.
Ити курдук, өрөспүүбүлүкэ депутаттарын VII Спартакиадатын призердарынан дьиэ кэргэн, оҕо аймах, ыччат дьыалаларыгар, физическэй култуураҕа уонна спортка сис кэмитиэт бэрэссэдээтэлэ Юрий Баишев, бюджет, үп, нолуок уонна сыана политикатыгар, бас билии уонна приватизация боппуруостарыгар сис кэмитиэт бэрэссэдээтэлэ Юрий Николаев, судаарыстыбаннай тутууга уонна сокуону оҥорууга сис кэмитиэт бэрэссэдээтэлэ Алексей Еремеев, тутууга уонна ДьУоКХ сис кэмитиэт бэрэссэдээтэлин солбуйааччы Юрий Садовников, норуот депутаттара Гаврил Алексеев, Гаврил Парахин, Алексей Филиппов, ону сэргэ Ыччат парламенын чилиэннэрэ Вера Дягилева, Саргылаана Степанова, Леонтий Еремеев, Илья Оконешников буоллулар.
Уопсай хамаанданан күрэхтэһиигэ 1-кы бөлөххө призердар:
1. Сунтаар улууһа;
2. Судаарыстыбаннай Мунньах (Ил Түмэн);
3. Нам улууһа.
2-с бөлөх призердара
(хотугу уонна Арктикатааҕы
улуустар МТ):
1. Өлөөн эбэҥки национальнай оройуона;
2. Кэбээйи улууһа;
3. Томпо оройуона.
Кыайыылаахтары наҕараадалааһын сиэригэр-туомугар “Спорка бэриниилээҕин иһин” бочуоттаах грамота Ил Түмэн сүүмэрдэммит хамаандатын капитана, дьиэ кэргэн, оҕо аймах, ыччат дьыалаларыгар, физическэй култуураҕа уонна спорка сис кэмитиэт бэрэссэдээтэлэ Юрий Баишевка туттарылынна.
