Мадьыны бирииһигэр күрэхтэһии

Оттон тустаах күрэхтэһии олунньу 18 күнүгэр «Триумф» спорт киинигэр ыытыллар. Бүгүҥҥү күҥҥэ биллэринэн, манна Мэҥэ-Хаҥаластан Айсен Спиридонов, Таатта улууһуттан «Кубок Чемпиона» турнир боруонса призера Николай Матаннанов, Усуйаана улууһуттан Дыгын оонньууларын үрүҥ көмүс уонна боруонса призера Алексей Козлов, «Орто Бүлүү Боотура» турнир кыайыылааҕа Николай Текеянов кыттар баҕалаахтарын биллэрбиттэр. Дьокуускайтан мас тардыһыытыгар аан дойду чемпиона Павел Черноградскай, Амматтан – Анатолий Анатольевич уола, СӨ мас тардыһыытыгар спорт маастара Егор Баишев итиэннэ аан дойду армлифтиҥҥэ чемпионатын үрүҥ көмүс призера, норуоттар икки ардыларынааҕы спорт маастара Игорь Кондаков кыттыахтара.
Күрэхтэһии бириистэрин фондата 450 тыһ. солк. тэҥ. Кыайыылаах 200 тыһ. солк. ылыаҕа, иккис призер – 150 тыһ. солк., боруонса призер – 100 тыһ. Ону сэргэ спонсордартан уонна тэрийээччилэртэн анал бириистэр туруоруллуохтара.
Киирии билиэттэринэн Амма биэрэгэр сэттэ учаастак, туристическай путевка, СКС карабин, МР-155 булт саата, нуорка саҕынньах, Амма дьэдьэниттэн минньигэс барыанньалар уо.д.а. үгүс оонньонор. Киирии билиэт сыаната – 1 000 солк.
Күрэхтэһии бырагырааматыгар 5 көрүҥ баар: «Сыарҕа соһуута» – 2 мүнүүтэ устата таһаҕаһы ханаат көмөтүнэн 30 м диэри соһуу; «Амма таас­тара» – кыттааччы 2 мүнүүтэ устата биэс тааһы көтөҕөн долбуурдарга ууруохтаах. Таастар ыйааһыннара 50-тэн 100 кг диэри, долбуур үрдүгэ 50-150 см, икки ардылара 15 м.; «Илии күүһэ» – спортсмен илиитинэн 5 тимир утаһынын, тирэммэккэ эрэ 90-тан тахса кыраадыска диэри токурутуохтаах (уһуна – 70 см, диаметра – 1 см). Киниэхэ 2 мүнүүтэ бэриллэр. Ким түргэнник оҥорбут кыайар. «Балаҕан нөҥүө таас быраҕыы» – 16 кг ыйааһыннаах гиирэни 5 м тэйиччи баар 2 м үрдүктээх планка нөҥүө быраҕыы. Хас биирдии кыттааччыга 3-тэ быраҕар кыах бэриллэр; «Таас көтөҕүүтэ» – манна тааһы төһө ыраахха илдьэриҥ учуоттанар. Санныга көтөҕөр табыллыбат. 2 мүнүүтэ бэриллэр.