Мас тардыһыытыгар аан дойду чемпионата чугаһаата

45 судаарыс­тыбаттан спортсменнар мас тар­дыһыытыгар Дьокуускай куоракка сэтинньи 24-25 кк. күөн көрсө кэлиэхтэрэ, ол иһигэр дойдуларынан көрдөххө: Армения, Азербайджан, Беларусь, Венгрия, Германия, Грузия, Исландия, Латвия, Литва, Польша, Россия, Сербия, Словакия, Украина, Финляндия, Чехия уонна Эстония. Россия хамаандатыттан ураты саамай элбэх ахсааннаах судаарыстыбалар хамаандалара: Венгрия, Латвия, Сербия уонна Украина.

Историята

РФ Госкомспордун 2003 сыл от ыйын 16 күнүнээҕи 546 №-дээх бирикээһинэн мас-рестлинг Бүтүн Арассыыйатааҕы реестргэ спорт национальнай көрүҥүн быһыытынан киллэриллибитэ. 2005 сыллаахха бэс ыйын 27 күнүгэр РФ Юстицияҕа министиэристибэтин федеральнай регистрациялыыр сулууспатынан “Мас-рестлинг Бүтүн Арассыыйатааҕы федерацията” уопсастыбаннай тэрилтэ быһыытынан регистрацияламмыта.
Санатар буоллахха, мас тардыһыытыгар аан дойду чемпионата Саха сирин киин куоратыгар 2014 сыллаахха ыытыллыбыта.

Хотугулуу Америкаттан икки судаарыстыба хамаандата кыттар: АХШ уонна Канада. АХШ хамаандата биллиилээх спортсмен Оддом Хоген салайааччылаах кэлэрэ биллэр. Быйыл кини бэтэрээннэр турнирдарыгар, оттон дьахталларга Канадаттан Калгари Бейли Дешен кыттыахтара.

Быйыл Азия уонна Европа судаарыстыбаларын хамаандатын ахсааннара тэҥ – 17-лии. Маны таһынан, Бангладеш, Индия, Казахстан, Кыргызстан, Монголия, Холбоһуктаах Арабскай Эмираттар, Пакистан, Таджикистан, Узбекистан уонна Шри-Ланка хамаандалара кытталларын таһынан аан маҥнайгытын Афганистан, Ирак, Иордания, Ливан, Палестина уонна Сирия барыллаан күөн көрсүһүөхтэрэ.