Мас тардыһыытын тула улахан кэпсэтии тахсыаҕа

СӨ физическэй кул­туу­раҕа уонна спортка министиэристибэтэ иһитиннэр­битинэн, чемпионат сүнньүнэн үгүс тэрээһиннэр былааннаналлар. Ол курдук, сэтинньи 22 күнүгэр Мас тардыһыыга аан дойдутааҕы федерация президиумун мунньаҕа буолара былааннанар. Мас тардыһыы быраабылатын, федерацияҕа саҥа дойдулары чилиэнинэн киллэрии боппуруостара көрүллүөхтэрэ, кэлэр сыллаах былааны бигэргэтиэхтэрэ. Онтон сэтинньи 23 күнүгэр ХИФУ-га научнай-практическай конференция ыытыллара былааннанар. Маны таһынан мас тардыһыытын спордун историятын, сайдар суолун кэпсиир быыстапка туруоҕа. Ил Түмэн саалатыгар мас тардыһыытын спордун сайдар саҕахтарын, сокуонунан мэктиэтин ырытыһар, атын дойдулар уопуттарын дьүүллэһэр киэҥ ыҥырыылаах “төгүрүк ос­туол” буолара былааннанар. Саамай дьону-сэргэни түмэ тардар тэрээһин – аан дойдутааҕы чемпионат сэтинньи 24-25 күннэригэр “Триумф” спортивнай комплекска буолар. Билиҥҥитэ 42 дойдуттан 200-чэ спортсмен кытта кэлэрэ биллэр. Күрэхтэһиигэ 49 судьуйа үлэлиэҕэ. Ол иһигэр 9 судьуйа — норуоттар икки ардыларынааҕы категориялаах, бүтүн Арассыыйа таһымнаах 6 судьуйа уонна регионнааҕы судьуйалар күрэхтэһии түһүмэхтэрин дьүүллүөхтэрэ. Оттон чемпионат кылаабынай судьуйатынан Казахстантан сылдьар норуоттар икки ардыларынааҕы категориялаах судьуйа Павел Фитисов буолар. СӨ физическэй култуураҕа уонна спортка министиэристибэтэ иһитиннэрбитинэн, РФ сүүмэрдэммит хамаандатыгар 10 саха спортсмена киирбит.
Аан дойду таһымнаах улахан спорт күрэҕин тэрээһинигэр Ил Түмэн ыччат дьыалатыгар, физическэй култуураҕа уонна спортка сис кэмитиэтэ кыттыһар. Ол туһунан кэмитиэт бэрэссэдээтэлэ Михаил Гуляев бу курдук иһитиннэрдэ:
— Чемпионат иһинэн научнай-практическай хабааннаах улахан тэрээһиннэр буолуохтара. Ил Түмэн саалатыгар ыытыллар “төгүрүк остуолга” мас тардыһыытын федерациятыгар киирэр дойдулар, Госдума, РФ спордун министиэристибэтин бэрэстэбиитэллэрэ, учуонайдар кыттыахтара. Мас тардыһыытын спорда хайдах сайдан кэлбитин, салгыы хайдах сайыннарыахтаахпытын, научнай чинчийиилэр тустарынан кэпсэтиэхпит, мас тардыһыытын олимпийскай спорт көрүҥнэригэр киллэрэр туһунан боппуруоһу ырытыһыахпыт. Ону, баҕар, сорох дойдулар соһуйа истиэхтэрэ. Итиэннэ мас тардыһыытын стандартын тула кэпсэтии тахсыаҕа. Арассыыйа стандарта аан дойду киэнин кытары биир буолуохтаах. Маны таһынан 72 чаастаах тренер квалификациятын үрдэтэр семинар буолуоҕа. Саха сирин парламена “Спорт национальнай көрүҥнэрин туһунан” өрөспүүбүлүкэ сокуонун ылыммыта. Онон биһиги, депутаттар, салгыы бу сокуон көдьүүстээхтик үлэлиирин туһугар үлэлэһиэхпит.

Арнольд Шварценеггер кэлиэ дуо?

СӨ спордун миниистирэ, Мас-рестлинг норуоттар икки арды­ла­рынааҕы федерациятын генеральнай сэкирэтээрэ Иннокентий Григорьев:

— Арнольд Шварценеггеры чемпионакка ыалдьыт быһыытынан ыҥырбыппыт. Ол гынан баран, билиҥҥитэ кэлэрин туһунан чуолкай иһитиннэрии суох. Кини Arnold Classic диэн турнирыгар мас тардыһыытын көрүҥүн киллэрэллэр. Бу спорт көрүҥүн үчүгэйдик билэр буолуохтаах диэн мас-рестлинг үөскээбит сиригэр ыалдьыт быһыытынан ыҥырбыппыт.