399
10 ноября 2017 в 11:16
Геннадий Охлопков “Ил Түмэн” парламент хаһыат “Үтүө санаалаах сурутуу” акциятыгар кыттыста
Саха Өрөспүүбүлүкэтин Ил Дарханын өйөбүлүнэн үлэлиир «Дьулуур» оҕо биир сомоҕо хамсааһынын бэрэссэдээтэлэ, РФ суруналыыстарын сойууһун чилиэнэ Геннадий Охлопков “Ил Түмэн” парламент хаһыатын “Үтүө санаалаах сурутуу” акциятыгар кыттыһан куорат стационарнай балыыһаларыгар хас да экземпляр хаһыат суруттарда.
— Мин “Ил Түмэн” хаһыаты сэргээн ааҕабын. Манна былаас уорганнарын үлэлэрин-хамнастарын туһунан сонуну, сокуоннар тустарынан эрэ буолбакка, култуура сонуннарын уонна олох-дьаһах интэриэһинэй түгэннэрин тустарынан матырыйааллары ааҕабын. Мин санаабар, хаһыат социальнай салаа бары үлэһиттэригэр интэриэһинэй буолуоҕа. Ол иһин, бастатан туран, куорат кэккэ балыыһаларыгар суруттардым. Оттон сытан эрэ эмтэнэр дьоҥҥо, биллэн турар, бириэмэлэрин көдьүүстээхтик атааралларыгар, “Ил Түмэн” хаһыат олус туһалыаҕа диэн эрэнэбин.
Парламент хаһыатын редакцията “Үтүө санаалаах сурутуу” акциятын ыытар, ол чэрчитинэн хас биирдии сурутуон баҕалаах киһи Дьокуускай куорат уонна өрөспүүбүлүкэ оройуоннарын социальнай тэрилтэлэригэр “Ил Түмэн” хаһыакка сурутууну бэлэхтиэн сөп.
Сыл аҥаарыгар редакциятааҕы сурутуу сыаната — 600 солкуобай, биир сылга — 1200 солкуобай.
Акцияҕа кыттар баҕалаах дьону Издательскай дьиэ уопсастыбаны кытта сибээстэргэ отделыгар маннык төлөпүөннэринэн сибээстэһэргитигэр көрдөһөбүт: 8(4112) 402-210; 89245961349.
Ону сэргэ “Ил Түмэн” Издательскай дьиэ уонна “Россия почтата” сөбүлэһии түһэрсибиттэрин түмүгэр, билигин ааҕааччыларбыт биһиги таһаарыыларбытыгар онлайн-режимҥэ сурутуохтарын сөп.
Онлайн-сурутууга аналлаах ссылка Pochta.ru. порталыгар баар.
