Ыҥырыыны Нам, Чурапчы улуустарын депутаттара өйөөтүлэр

“Биһиги үлэбитин мэлдьи сырдатар хаһыаппытын өйөөн буоллаҕа!”, “Хаһыаттан үгүс туһалааҕы ааҕабыт, киһини сэргэхситэр матырыйааллар тахсаллар”. Бу курдук истиҥ тыллары биһиги редакциябыт Нам улууһугар тахса сылдьан, депутаттары кытары көрсүһүүгэ иһиттэ.

Санатар буоллахха, сурутуу хампаанньата бара турар кэмигэр Амма Болугурун бэрэстэбиитэллээх уорганын депутаттара “Ил Түмэн хаһыаппытыгар суруттарыаҕыҥ!” диэн ыҥырыы таһаар­быттара. Болугур баһы­лыга, нэһилиэк депутаттарын сэбиэтин бэрэссэдээтэлэ Степан Кузьмин: “Биир сыалы-соругу тутуһар дьоммутугар, өрөспүүбүлүкэбит нэһи­лиэктэрин, улуустарын депутаттарыгар Амма Болугурун депутаттарын ааттарыттан этиэм этэ: “Ил Түмэн” хаһыакка суруттарыҥ! Хаһыат биһиги үлэбитин көдьүүстээхтик тэрийэрбитигэр көмөлөһөр уонна үлэбитин дьоҥҥо-сэргэҕэ кэпсиир” диэн ыҥырыытын атын улуус депутаттара өйөөн эрэллэр. Ол курдук, Бүлүү улууһун Лөкөчөөн уонна Илбэҥэ нэһилиэктэрин депутаттара Анна Доргонова уонна Дарианна Андреева хаһыакка суруттаралларын этэн, атыттары эмиэ хаһыакка сурутуу хампаанньатын өйүүллэригэр ыҥырбыттара.

___________________________

Нам улууһун депутаттара “Ил Түмэн” хаһыаты суруттарыҥ!” диэн ыҥырыы эстафетатын өйөөтүлэр

____________________________

Бу күннэргэ Намҥа депутаттар сессиялара буол­ла. Редактор Наталья Попова бастакы командировкатын төрүттэрин сириттэн саҕалаабытын уонна “Ил Түмэн” хаһыат депутаттарга сокуоннары ырытарга остуолларыгар сытар сүбэһит буоларыгар сурутарга ыҥырда. Сессия кэнниттэн биһиги кинилэри кытары ирэ-хоро кэпсэттибит, санааларын иһиттибит. Ол курдук, депутаттар “Ил Түмэн” хаһыакка дьоһун, ону кытта сэргэх матырыйааллар бэчээттэнэн тахсалларын бэлиэтээтилэр. “Сурутуу саҕаланна даҕаны суруттарааччыбын.

Хаһыаттан үгүс элбэҕи билэбин. Кырдьыктаах источниктан сонуну ааҕабын диэн бигэ эрэллээх буолабын. Билигин батсаап, араас социальнай ситимнэр сонуннары болҕомто тардаары арааһынайдык токурутан таһаараллар. Уопсайынан, норуокка депутаттары “үөҕүү” мэлдьи баар курдук. Дьиҥэр, ханнык баҕарар докумуону бэлэмниир­гэ, ылынарга үтүмэн үлэ барар. Дьэ, кинилэр үлэлэрин бу эһиги хаһыаккыт кэпсиир. Дьон ылынарын курдук судургу, өйдөнөр курдук суруйаргытын астына ааҕабын. Онон депутаттар эрэ буолбакка, уопсайынан, сокуон оҥоһуллар эйгэтигэр сонуннары сэргиир, билиэн баҕалаахтар “Ил Түмэн” хаһыаты суруттарыахтарын сөп эбээт”, — диэн депутаттар санааларын үл­лэһиннилэр.
Ол курдук, кинилэртэн биир­тэн-биир биһиги суру­йар үлэбитин кынаттыыр үчүгэй тыллары иһиттибит. Көр­сүһүү­бүт түмүгэр Нам улууһун депутаттара “Ил Түмэн” хаһыаты суруттарыҥ!” диэн атын улуус депутаттарыгар эмиэ ыҥырыы таһаардылар.

________________________________

“Сонуну хайдах баҕарар токурутан таһаарар үйэ кэллэ.
Ол иһин “Ил Түмэн” хаһыаппыт кырдьыктаах сонуннарын ааҕабыт”

________________________________

Улуус депутаттарын Сэбиэ­тин бэрэссэдээтэлэ Иван Попов:
— Биһиги сылбытын түмүк­тээн эрэбит. Бүгүн Нам улуу­һа 2018 сыллаах бүддьүөтүн бастакы ааҕыыга ылынныбыт. Кэлэр ыйга публичнай истиилэри ыытан баран, ахсынньы ый бүтэһигэр букатыннаахтык ылыныахпыт. Ый аайы сессиябытын оҥоробут. Бүддьүөт ылынарбытыгар бастакы уочарат хамнаска, ОДьКХ салаатыгар болҕомтобутун уурабыт. Билигин суумалары билгэлээһин эрэ быһыытынан таһаарабыт. 23 муниципальнай тус бырагыраамалаахпыт. Билиҥҥи туругунан суумалара чопчулана иликтэр.
2017 сылы Максим Кирович Аммосов сылынан биллэрбиппит. Араас тэрээһиннэри ыытан, улуу киһибит аатын салгыы үйэ­титэн сылы түмүктээн эрэбит. Ил Дархан Егор Борисов 2018 сылы Дьарыктаах буолуу сылынан биллэрдэ. Биһиги улууспутугар эмиэ Дьарыктаах буолуу сылын биллэрэр туһунан санаалаах этибит. Бу хайысхаҕа тус бырагыраамалаахпыт. Улууспут куораттан чугас сытар буолан дьон олохсуйар. Үлэ миэстэтэ тиийбэтин кыһалҕата сытыытык турар. Бүгүн сессияҕа бүддьүөтү таһынан устаабы уларытыы боппуруоһун көрдүбүт. Итиэннэ оскуола оҕотун аһылыгын тула кэпсэттибит. Ити олус сытыы боппуруос. Кыаммат ыаллар оҕолоругар өрөспүүбүлүкэ үп көрөр. Бу ыстатыйаҕа хапсар араас категориялар бааллар – кыаммат, элбэх оҕолоох ыаллар. Биһиги икки сыллааҕыта хас биир­дии оҕоҕо 80 солк. көрөн туран, бу категориялары барыларын тэҥнииргэ диэн быһаарыы ылыммыппыт. Ол курдук, 8 мөл солк. курдук бүддьүөппүтүгэр көрбүппүт. Бу боппуруоспутун бүгүҥҥү сессиябытыгар көрдүбүт.
Сыл бүтэһигэр депутаттар үлэлэрэ элбиир. Ханнык баҕарар үөскээбит боппуруоһу нэһилиэнньэҕэ туһалаах буоларын курдук бары өттүттэн ырытан көрөн баран, ылынабыт. Биһиги үлэбитигэр “Ил Түмэн” хаһыат сырдатынар хайысхабытынан буолар. Онон салгыы үлэҕит таһаарыылаах буоларыгар баҕарабыт. Оттон биһиги, улуус депутаттара, өйүөхпүт диэн эрэннэрэбин.

* * *
Амма, Бүлүү, Нам улуустарын депутаттара “Ил Түмэн” хаһыаты өйүүргэ ыҥырыыларын Чурапчы улууһун депутаттара өйөөтүлэр.

Чурапчы улууһун баһылыга Андрей Ноговицын, улуус Сэбиэтин депутаттара уонна Хайахсыт нэһилиэгин уопсастыбанньыктара бастакы ыҥырыылаах Ил Түмэн Бэрэстэбиитэллэрин Палаататын спикерэ Афанасий Илларионов төрөөбүтэ 75 сылын бэлиэтиир тэрээһиннэрин иһинэн ыытыллыбыт Ил Түмэн депутаттарын кытары көрсүһүүгэ кытыннылар. Биллэрин курдук, Афанасий Илларионов Хайахсыт нэһилиэгиттэн төрүттээх. Хайахсыт баһылыга Василий Прудецкай долгуйан туран биһигини кытары санаатын үллэһиннэ.
— Өрөспүүбүлүкэбитигэр саҥа парламентаризм института сүһүөҕэр туруутугар, сайдыытыгар сүҥкэн өҥөлөөх киһинэн судаарыстыбаннай деятель, бастакы ыҥырыылаах Ил Түмэн Бэрэстэбиитэллэрин Палаататын спикерэ, Саха Өрөспүүбүлүкэтин үтүөлээх юриһа, поэт-тылбаасчыт Афанасий Петрович Илларионов буолар. Биһиги, хайахсыттар, биир дойдулаах улуу киһибитинэн киэн туттабыт. Былырыыҥҥыттан саҕалаан үгүс тэрээһиннэр буоллулар. Үүнэр ыччакка Афанасий Илларионов өрөспүүбүлүкэтин туһугар үтүө үлэтин тиэрдэ сатаатыбыт.

“Ил Түмэн” хаһыат сирэйигэр өрөспүүбүлүкэбит үүнэрин-сайдарын туһугар кыһаллан туран үлэлээбит дьон туһунан элбэх матырыйааллар тахсаллар. Мин ону кэрэхсии ааҕабын. Ол иһин нэһилиэгим депутаттарыгар хаһыат туһатын туһунан этээччибин. Билигин да атын улуустартан депутаттар “Ил Түмэн” хаһыакка суруттарарга ыҥырар этиилэригэр кыттыһабын уонна суруттаралларыгар ыҥырабын.