“Ил Түмэни” суруйтарарга бэлэмҥит дуо?

Мин «Ил Түмэн» парламент хаһыатын сурутууга эппиэти­нэстээх редактора Алексей Матвеев диэммин, билсиһэн кэбиһиэҕиҥ.
— Хаһыакка сурутуу туһунан кылгастык быһааран суруйар наада диэн, эһиэхэ, ааҕааччыларга, таҕыстым. 2019 сылга сурутуу үгэннээн бара турар. Бэчээт эйгэтигэр үлэлиир тэрилтэлэр бары күүскэ үлэлэһэ сылдьаллар. Ааҕааччылар, бэлиэтээн көрөргүт курдук, хаһыаттар, сурунааллар бары нэһилиэнньэ чопчу араҥатыгар ананан тахсаллар.
— “Ил Түмэн” парламент ха­һыата норуокка ананан тахсар. Тоҕо норуокка ананарый? Бэрэс­тэбиитэллээх былаас — Ил Түмэн уонна норуот бэрэстэбиитэллэрэ — норуот депутаттара хайдах үлэлииллэрин, тугу гыналларын норуот билиэхтээх дуу, суох дуу? Биллэн турар, билиэхтээх, ону ааһан ситимнээх буолуох­таах. Былааһы кытта норуот ситимэ хаһыатынан бөҕөргүүр.
— Парламент хаһыата норуот депутаттарыгар ананар, кинилэр үлэлэригэр тирэх буолар. Депутат тоҕо хаһыакка наадыйарый? Норуотун кытта хаһыатынан биир буолар, үлэтэ, дьайыыта билиигэ тахсар. Хаһыаттан билиитин-көрүүтүн хаҥатар, атын депутаттар, муниципальнай тэриллиилэр үлэлэрин кытта билсэр, уопуттарын ылынар, бэйэтин санаатын, этиилэрин киллэрэр, туруорсар. Ол иһин, депутат ханна да олордун, үлэлээтин, “Ил Түмэн” парламент хаһыатыгар, депутаттар хаһыаттарыгар булгуччу сурутуохтаах диэн бигэ санаалаахпын. Сыыһар буоллахпына утаран суруйуоххутун, биллэриэххитин сөп, сөпсөһөр буоллаххытына, суругунан биллэрээриҥ.

«Саха сирин депутаттара бары да “Ил Түмэни” суруйтараллара буолуо дии саныыбын! Хайдах депутаттар парламент хаһыата суох буолуохтарай?”

 

— Үөһээ Дьааҥы улууһуттан сылдьар депутат Дьулустаан Потапов (хаартыскаҕа) мин санаабын бигэргэтэн, бу күннэргэ “Ил Түмэн” хаһыакка суруйтарда.
Кини Үөһээ Дьааҥы биир кытыы сиригэр – Улахан Күөл нэһи­лиэгин киинэ Табалааах бөһүөлэгэр олорор, үлэлиир, бэйэтэ бу сиртэн төрүт-уус силистээх. Төһө да эдэрин иһин, нэһилиэгэр 2007 сыл­тан депутатынан талыллан үлэлээбитэ 11 сыла буолбут. Кини парла­мент хаһыатын норуот депутаттарыгар анаан ыытыллар “Үтүө санаалаах сурутуу” акцияны өйөөн суруйтарда.
— Хаһыаппыт, почта кэлин кыратык хойутаан да буоллар, син кэмигэр кэлэр, тиэрдиллэр буолла. Онон хаһыат, сурунаал суруйтарабыт. Дьаһалтабытыгар парламент хаһыатын суруйтарабыт. Мин бу сырыыга бэ­йэм көҕүлээммин “Ил Түмэн” хаһыаты нэһилиэкпит аҕам саастаах дьонун сомоҕолуур «Илгэ» түмсүүгэ, салайааччы Светлана Христофоровна Борисова аатыгар суруйтарабын. “Илгэ” тэриллибитэ 10-ча сыл буолла, нэһилиэккэ бары тэрээһиннэри ыытарга кытталлар. Соторутааҕыта эдэр ийэлэр ортолоругар иискэ маастар-кылаас оҥорбуттара, араас бүлүүдэлэринэн быыстапка, көрсүһүү ыытааччылар. Кинилэр куруук түмсэллэр, онно элбэх киһи хаһыаты ааҕыаҕа, сонуну билиэҕэ дии саныыбын.
“Саха сирин депутаттара бары да “Ил Түмэни” суруйтараллара буолуо дии саныыбын! Хайдах депутаттар парламент хаһыата суох буолуохтарай? Биһиги биир ситимнээх үлэлээхпит”, — диэн Дьааҥы эдэр депутата кырдьыгы этэр эбээт. Онон Ил Түмэн депутатыттан саҕалаан, оройуон, куорат, нэһи­лиэк Сэбиэтин, Мунньаҕын депутаттара, хас биирдиигит, бары “Ил Түмэни” суруйтарарга бэлэмҥит дуо?!