10 ноября 2017 в 11:38

Өрөспүүбүлүкэҕэ үрдүк технологиянан эмтээһин

Саха Өрөспүүбүлүкэтин Күннэрин чэрчитинэн Москва к. доруобуйа харыстабылыгар Департаменын Н.В.Склифосовскай аатынан суһал көмө научнай-чинчийэр институтугар Саха Өрөспүүбүлүкэтигэр үрдүк технологиялаах медицинскэй көмөҕө анаммыт “төгүрүк остуол” буолан ааста. Манна Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Александр Корякин кыттыыны ылла. Ити туһунан СӨ парламенын пресс-сулууспата иһитиннэрдэ.

Н.В.Склифосовскай аатынан суһал көмө научнай-чинчийэр институтун директора Сергей Петриков мунньах кыттыылаахтарыгар медицинскэй тэрилтэтин үлэтин билиһиннэрдэ уонна дьүүллэһиллэр проблема улахан суолталааҕын бэлиэтээтэ.
«Саха Өрөспүүбүлүкэтэ нейрохирургияҕа үрдүк технологиялар көмөлөрүнэн эмтэммит ыарыһахтарын ахсаанынан Россияҕа бастакы миэстэлэртэн биирдэстэригэр сылдьар. Биэс сыл анараа өттүгэр Саха сиригэр мэйиигэ, ол курдук эчэйиигэ, аневризмаҕа уустук эпэрээссийэлэри ким да оҥорбот этэ, оттон бүгүн итини ситиһиилээхтик уонна балайда элбэхтик оҥорор буоллулар. Нейрохирургияҕа идэлээх киһи буоларым быһыытынан, эһиэхэ нейрореанимация көмөтө, инсультаабыт, инфарктаабыт дьону эмтээһин күүскэ барарын билэбин», – диэтэ институт директора.

А.И.Евдокимов аатынан МГМСУ клиническэй медицинскэй киинин директора, РНА академига, профессор, РФ Доруобуйа харыстабылыгар министиэристибэтин кылаабынай нейрохирура Владимир Крылов ааҕарынан, мэйии аневризматын эпэрээссийэлээһиҥҥэ Саха сирэ бүгүн дойдуга бастыҥнартан биирдэстэрэ буоларыгар Сергей Петриков мустубут дьон болҕомтотун туһаайда.
Ил Түмэн туһааннаах сис кэмитиэтин бэрэссэдээтэлэ Александр Корякин Москваҕа Саха сирэ Россия судаарыстыбатын састаабыгар киирбитэ 385 сылыгар анаммыт Саха Өрөспүүбүлүкэтин Күннэрэ саҕаламмыттарын, ол чэрчитинэн “төгүрүк остуол” ыытылларын бэлиэтээтэ. Кини медицина салаатыгар исписэлиистэри бастыҥ уопуту атастаһыыны салгыырга ыҥырда, Саха сирин доруобуйа харыстабылыгар уопута Москваҕа эмиэ туһалаах буолуоҕар эрэнэрин эттэ.
Салгыы өрөспүүбүлүкэ доруобуйа харыстабылыгар миниистирин бастакы солбуйааччы Олег Припузов СӨ-гэр үрдүк технологиялаах медицинскэй көмө туһунан сиһилии сырдатта. Саха сиригэр кэнники сылларга үрдүк технологиялаах көмө тэтимнээхтик сайдарын, ол суотугар федеральнай клиникаларга айанныыр ыарыһахтар ахсааннара намтаабытын, көмөҕө наадыйар пациеннар 60-тан тахса бырыһыаннара өрөспүүбүлүкэҕэ эмтэнэллэрин бэлиэтээтэ.
“Төгүрүк остуол” кыттыылаахтара офтальмологияҕа үрдүк технологиялаах медицинскэй көмө саҥа туһаайыыларын, куолай искэнигэр үрдүк технологиялаах хирургия боппуруостарын дьүүллэстилэр, онкохирургияҕа үрдүк технологиялаах көмө уопутун атастастылар.

2№-дээх Өрөспүүбүлүкэтэээҕи балыыһа – Саха сиринээҕи суһал медицинскэй көмө киинин уонна Н.В.Склифосовскай аатынан суһал көмө нучнай-чинчийэр институтун икки ардыларыгар бииргэ үлэлиир туһунан бастакы Сөбүлэһиигэ илии баттааһын суолталаах түгэнинэн буолла.

РФ Президенин иһинэн СӨ Бастайааннай Бэрэстэбиитэлистибэтин пресс-сулууспатын хаартыскалара.