Сааскы маҥнайгы күн

Театрга кэлбит дьон элбэҕи, кэрэни көрөр эрэл санаалаах, Саха норуодунай поэта Леонид Попов төрөөбүтэ 100 сылыгар аналлаах, кини хоһооннорунан туруоруллубут «Уйбаанчык» диэн Сахабыт сирин чаҕылхай режиссера, биһиги, сунтаардар, уолбут, Сергей Потапов туруорбут саҥа испэктээгин көрө кэлэн олоробут.
Сцена быыһа аһыллаатын кытта айымньы иһигэр, оччотооҕу ойууланар би­риэмэҕэ баар буола түстүбүт.
Саха эдэркээн оҕото, 18-таах Уйбаанчык бэйэтэ тылланан сэриигэ барар түгэнэ көстөр. Дьоно-сэргэтэ бырастыылаһыылара киһи дууһатын таарыйар. Оҕотун сэриигэ атаарар ийэ хайдах муҥнанарын, тулуурун, иитэн-бүөбэйдээн, сүрэҕин сылааһын иҥэрбит оҕото алаһа дьиэтиттэн ыраах аттанара барыбытын долгутта…
Артыыстар бэйэлэрин оруолларын көрөөччү дууһатыгар тиийэр гына долгутуулаахтык, иһирэхтик оонньоотулар. Ордук мин эдэр дьон — Уйбаанчыктаах Маайыс (Эстрада театрын ырыаһыттара Иннокентий Лебедев уонна Амгаяна) бастакы тапталларын көрөн уйадыйдым. Уйбаанчык кыыһын кытта көрсүһүүтэ, кинилэр сырдык, ыраас сыһыаннара, ыра санаалара хайа көрөөччү сүрэҕин хамсаппат буолуой?! Бу түгэннэргэ Леонид Попов ырыалара киирэн биэрбиттэрэ, испэктээк ис хоһоонун олус байытан, тупсаран биэрдэ.

“Илиибэр эн илииҥ  баар курдук,
Сүрэхпэр сүрэҕин сылааһа…” ырыа ылланна.

Сэрии алдьархайа тө­һөлөөх саха ыччатын ситэ олорботох, ситэ таптаабатах олохторун илдьэ барбыта буолуой? Эдэр киһи аан бастакы кыргыһыыга киирэн иһэн, өстөөх буулдьатыттан бааһыран үрүҥ күнэ быстара кыһыылаах. Бу айымньынан режиссер Сергей Потапов Ийэ дойдуларын көмүскэлигэр кыргыспыт, олохторун толук биэрбит саха уолаттарын дьылҕаларын Уйбаанчык уобараһын нөҥүө чаҕылхайдык көрдөрдө.

Уйбаанчык тыына быстар түгэнигэр, ыраах хаалбыт Сахатын сиригэр дууһата бырастыылаһа кэлэрэ көрөргө дьулаан этэ. Саалаҕа олорор дьон бука бары харах уулаах, ытыахтарын туттунан, көрөн олордулар. Сэрии толоонуттан эргийбэтэх эдэр буойун салгын кута таптыыр кыыһын Маайыһы, ийэтин, аҕатын уонна эһэтин, төрөөбүт алааһын, доҕорун Арамааны барыларын кытары көрсөр, кэпсэтэр. Эйэлээх олох хайдах курдук кэрэтин, дьоллооҕун испэктээги туруорааччы С. Потапов дьиҥнээҕинэн, олоххо баарынан көрдөрөр.
Испэктээги көрө олорон сэрии алдьархайа хатыламматыгар, эйэлээх олох салҕанан барарыгар, хас биирдии Уйбаанчык курдук уолаттар олохторо, тапталлара салҕанан бара турарыгар ис сүрэхпиттэн баҕардым.
Испэктээги туруорбут Сергей Потаповка уонна умнуллубат оруоллары оонньообут эстрада театрын талааннаах артыыстарыгар: Иннокентий Лебедевка, Амгаянаҕа, Никаҕа, Эрчимҥэ, Александр Бурнашевка, Айгылааҥҥа уо.д.а. махтал. Өссө да үүнэ-сайда, чэлгийэ турдуннар.
Леонид Попов ырыа буолбут хоһооннорун туруорааччы-режиссер Сергей Потапов сөрү-сөпкө киллэртээн, аныгы истээччигэ тиийимтиэ гына оҥорон, артыыстары ыллатан, биһигини — көрөөччүлэри долгуттулар. Испэктээк биир тыынынан барда.

Изабелла Попова,
Леонид Попов
балта, Сунтаар нэһилиэгин Бочуоттаах олохтооҕо, РФ үөрэҕириитин туйгуна

Хаартыскаларга:
1. Л.Попов уола А.Попов, балта И.Попова, поэт сиэнэ Марат.
2. Икки биллиилээх поэт – Леонид Попов уонна Василий Гольдеров оҕолоро — А.Попов, С.Гольдерова – Саргы Куо.