«Turkish Airlines» хампаанньа Саха сиригэр үлэлиир баҕалаах

Соторутааҕыта Дьокуускай – Стамбул – Дьокуускай тиһигэ быстыбат рейстэри тэрийии боппуруоһа СӨ предпринимательствоҕа, эргиэҥҥэ уонна туризмҥа министиэристибэтин баһылыга Ирина Высоких аан дойдутааҕы гражданскай авиация лидерэ – «Turkish Airlines» авиахампаанньа бэрэстэбиитэллэрин кытта көрсүһүүтүгэр сүрүн теманан буолла.

Москва куоракка баар ити авиахампаанньа бэрэстэбиитэлистибэтин генеральнай директора Туран Йардымджы, «Turkish Airlines» административнай директора Владимир Кириллов кыттыылаах мунньах атырдьах ыйын 6  к. министиэристибэҕэ буолан ааста. Саха сирин өттүттэн боппуруоһу дьүүллэһиигэ “Саха сирин тутааччыларын сойууһа” СРО Ассоциациятын генеральнай директора  Айхал Габышев, «Якутия» Национальнай туристическай-иһитиннэрэр киин генеральнай директора Наталья Тюкавкина, «Якутия» авиахампаанньа коммерческай директора Андрей Винокуров уонна СӨ ГАВС туристическай салаатын салайааччыта Ирина Шипкова кыттыыны ыллылар.

Предпринимательство министиэристибэтин баһылыга Ирина Высоких бэлиэтээбитинэн, бу сүбэ мунньах – турок коллегалары кытта бу иннинэ буолбут көрсүһүүлэри салҕааһын, ол көрсүһүүлэргэ Турция авиахампанньаларын кытта бииргэ үлэлээһин саҕаланыан сөбүн туһунан кэпсэппиттэрэ. Ол иһин министиэристибэҕэ буолбут көрсүһүүгэ олохтоохтук кэпсэтэр туһугар “Якутия” авиахампаанньаны уонна «ГАВС» туристическай агентствоны ыҥырарга быһаарыллыбыта. Ирина Высоких Саха сиригэр  “Turkish Airlines” салайааччыларын ыҥырбытын иһин Айхал Габышевка махтанна.

«Икки авиахампаанньа бииргэ үлэлээһинэ Турция уонна Саха сирин туристическай кыахтарын көдьүүстээхтик туһаныыга, ону сэргэ Турция уонна Саха сирин предпринимателлэрин икки ардыларыгар бизнес-сыһыаннаһыылар сайдыыларыгар  усулуобуйалары үөскэтиэҕэ», – диэн бэлиэтээтэ Ирина Высоких. Санаттахха, Турцияҕа Саха сирин үтүө аатын-суолун үрдэтэр сыалтан Омер Махмудоглу көҕүлээһининэн Антальяҕа сыл саҥатыгар Турция уонна Саха сирин предпринимателлэрин Ассоциацията үөскээбитэ. Ассоциация СӨ предпринимательствоҕа министиэристибэтин кытта бииргэ үлэлээһин былаанын оҥорбута.

Көрсүһүү кэмигэр өрүттэр «Turkish Airlines» уонна «Якутия» хампаанньалар хардарыта барыстаахтык бииргэ үлэлиир кыахтарын дьүүллэстилэр. Чуо­лаан, Антальяҕа туристар баһыйар үгүстэрэ ыам ыйыгар саҕаланар уонна балаҕан ыйыгар түмүктэнэр туристическай сезон үгэнигэр көтөллөрүн учуоттаан, бастатан туран, Дьокуускай – Стамбул – Дьокуускай маршрутунан тиһигэ быстыбат рейстэри тэрийии кыахтарын көрдүлэр. Оттон Дьокуускай – Анталья – Дьокуускай маршрутунан сайыҥҥы кэмҥэ сөмөлүөт көтүөн сөп.

Тойон Туран Йардымджы Турция авиахампаанньата Саха сирин уонна Турция икки ардыларыгар бастайааннай рейстэр толоруллалларыгар суоттанарын иһитиннэрдэ. “Биһиги дьыл кэминэн барыйааны эрэ көрбөппүт”, – диэтэ кини.

Аҕа дойдутааҕы туроператордар дааннайдарынан, Уһук Илин олохтоохторо Турцияҕа айанныыр баҕалара улахан. Оттон бүгүҥҥү күҥҥэ Саха сирин туристара Турцияҕа диэри Россия киин куораттарын нөҥүө эрэ тиийэллэр. Холобур, туристическай сезон үгэнигэр, Турция куруортарыгар көтөллөрүгэр Москванан айанныахтаахтар, оттон онуоха диэри сөмөлүөт билиэтин сыаната 60-80 тыһ. солк. тиийэр. Итини иһитиннэрэн туран, Саха сирин өрүтэ Уһук Илин бары регионнарын олохтоохторо уонна ыалдьыттара Турцияҕа көтөр туочукаларынан Дьокуускай аэропордун оҥорор барыйааны эттэ.  Турция өрүтэ ити этиини өйөөтө уонна Саха сирэ кинилэри биир үтүө статистиканан тардыбытын эттэ – өрөспүүбүлүкэ киин куоратын нэһилиэнньэтэ 320 тыһ. киһи эрээри, “Дьокуускай” аэропорт нөҥүө 900 тыһыынчаттан тахса пассажир айанныыр.

«Биһиги «Turkish Airlines» курдук аан дойду бастыҥ хампаанньатын кытта үлэлиир кыаҕы олус үрдүктүк сыаналыыбыт. Чугастааҕы кэмҥэ икки өрүккэ барыстаах бииргэ үлэлээһин туһунан чопчулаан дьүүллэһиэхпит диэн эрэнэбит», – диэн иһитиннэрдэ “Якутия” авиахампаанньа коммерческай директора Андрей Винокуров.

Саха сиригэр аан дойду авиахампаанньатын тардыыны саҕалаабыт Айхал Габышев манныгы бэлиэтээтэ: «Быйыл биһиги национальнай бырааһынньыкпытыгар улахан доҕорбут Билаль Эрдоган сырытта, биһиги өрөспүүбүлүкэлэр икки ардыларыгар  тиһигэ быстыбат быһа рейстэри тэрийии наадатыгар кинини итэҕэппиппит. Ол кэннэ хас да күн буолан баран миигин «Turkish Аirlines» авиахампаанньа директордарын Сэбиэтин бэрэссэдээтэлэ тойон Илкер Айджыны кытта көрсүһүүгэ ыҥырбыттара. Кинини кытта Дьокуускай – Стамбул – Дьокуускай маршрутунан тиһигэ быстыбат рейстэри тэрийии кэскилин сиһилии дьүүллэспиппит. Тоҕо Стамбул? Бастатан туран, бэйэбит туристарбытыгар тупсаҕай усулуобуйалары үөскэтиэх тустаахпыт. Иккиһинэн, биһиги Саха сирин табаары оҥорооччуларыгар кэнэҕэс бэйэлэрин бородууксуйаларын аан дойду ырыынагар таһааралларын тэрийиигэ табыгастаах уонна туруктаах усулуобуйалары үөскэтиэхтээхпит. Ону сэргэ Дьокуускай – Стамбул маршруттара Турция атын куруорт куораттарыгар тахсарбытыгар бэртээхэй кыаҕы биэриэхтэрэ, Саха сирин дьоно Москва нөҥүө транзикка харчыларын орос­куоттаабакка онно көтөн тиийэн сынньаныахтара. Аны аан дойдуга биллэр Турция авиахампаанньата кэллэҕинэ, тилэх баттаһан Турция уонна атын дойдулар инвестордара кэлиэхтэрэ диэн эрэнэбин. Ол эбэтэр бөдөҥ инвестордар аан дойду мааркалаах авиахампаанньаларга эрэ итэҕэйэллэр. Биһиги Турция өрүтүн итэҕэттибит уонна Саха сиригэр аан бастакынан аан дойду таһымнаах авиахампаанньаны аҕалыахпыт. Мин санаабар, бу боччумнаах хардыы итиэннэ Саха сирин дьоно аан дойдуга тахсалларыгар эрэ буолбакка, атын дойдулар туристара  өрөспүүбүлүкэбитигэр кэлэллэригэр барыстаах. Саха сирэ инвестициялары тардыытын үрдэтиигэ бары хайысхаларынан аан дойду таһымнаах мааркалары булгуччу олоххо киллэриэхтээхпит. Баһылык Айсен Николаев өрөспүүбүлүкэ үтүө аатын-суолун үрдэтиигэ улахан таһымнаах үлэни ыытар, онон лидербитин өйүөх тустаахпыт».

Сотору кэминэн Саха сирин олохтоохторо уонна ыалдьыттара аан дойдутааҕы авиа-гранд «Turkish Аirlines» эҥкилэ суох сервиһинэн туһанар уонна Стамбултан аан дойдуга барытыгар айанныыр кыахтаныахтара диэн эрэнэбит.

Бэлиэтээн эттэххэ, “Turkish Airlines” авиахампаанньа ханнык баҕарар атын салгынынан тиэйээччилэрдээҕэр элбэх дойдуга көтөр. Турция национальнай сөмөлүөтүнэн тиэйээччитэ Европаҕа да, аан дойдуга да бастыҥ авиахампаанньа аатын биирдэ эрэ ылбатаҕа. Авиахампаанньа сөмөлүөккэ бастыҥ кейтеринг (аһы-үөлү хааччыйыы), бастыҥ хааччыйыы иһин наҕараадалардаах, онтон киһи дьиктиргээбэт – “Turkish Airlines” сөмөлүөтүнэн биирдэ эрэ да көппүт киһи тупсаҕай усулуобуйа туһунан билэр.   Ол курдук хампаанньа айан хас биирдии түгэнигэр пассажирдарга үчүгэй усулуобуйаны үөскэтэргэ кыһаллар.

Мария Павлова,

СӨ предпринимательствоҕа, эргиэҥҥэ уонна туризмҥа министиэристибэтин пресс-сулууспатын матырыйаалынан