Вячеслав Штыров Федерация Сэбиэтигэр тыа хаһаайыстыбатын сайыннарыыга саҥа тосхол наадатын эттэ

Александр Ткачев ааспыт сылга ситиһиллибит кирбиини тупсарар, бааһына иэнин кэҥэтэр, экспортка таһаарыллар тыа хаһаайыстыбатын бородууксуйатын элбэтэр сорук турарын кэпсээтэ. 2017 с. бурдукка өтөрүнэн ылылла илик үүнүү (134,1 мөл т.) хомуллан, 45–47 мөл. т бурдук экспортка батарыллар буолбут. Ас-үөл атын да көрүҥнэрин, холобур, үүнээйи арыытын, саахары, сүөһү уонна көтөр этин тас дойдуларга батарыы улаатан иһэр. Сыл түмүгүнэн тыа хаһаайыстыбатын бородууксуйатын уонна аһы-үөлү экспортка таһаарыы кээмэйэ 15 бырыһыанынан улааппыт.

Иһитиннэрии түмүгүнэн тэриллибит санаа атастаһыытыгар сенатор Вячеслав Штыров кэлиҥҥи сылларга тыа хаһаайыстыбатын сайыннарыыга хамсааһын чахчы таҕыста, ол эрээри дьиҥ баар быһыыны-майгыны дириҥник ырытан көрөр наада диэтэ. Миниистир дакылаатыгар болҕомтону сүрүннээн бурдук хаһаайыстыбатыгар уурда, былырыын бурдук хомууругар чыпчаал көрдөрүү ситиһиллибит буоллаҕына, ааспыт биэс сыл устатыгар орто үүнүү сэбиэскэй былаас кэлиҥҥи биэс сылынааҕы таһымыгар тэҥнэспит. Сүөһү иитиитэ, чуолаан, үүт хайысхалаах сүөһүнү иитии ситэ сайдыбакка турарынан, тыа хаһаайыстыбатын өйөөһүҥҥэ билигин баар ырычаахтары илдьэ сылдьыахха, ол гынан баран сүөһү иитиитин, сиртэн үүнээйини ылыыны сайыннарыыга саҥа хайысха наада диэтэ.

Эрэгийиэннэр уратыларын учуоттуурга, болҕомтону хара буора суох сирдэргэ, Сибииргэ уонна Уһук Илиҥҥэ ордук уурарга эттэ. Сибээс, суол-иис мөлтөҕө уонна өҥ буордаах сир дэлэйэ суоҕа бөдөҥ холдиннары тэрийэри мэһэйдиэ, инньэ гынан, бааһынай хаһаайыстыбаларынан үлэлиир ордук буолуо, онуоха өйөбүл саҥа ырычаахтарын тобулан, тыа хаһаайыстыбатын кэпэрээссийэтин батарар, потребительскэй уонна үлэни-хамнаһы тэрийиигэ өҥөнү оҥорор киэптэрин көдьүүстээхтик туһаныахха диэтэ.

— Мин санаабар, билигин, дойду социальнай-экономическай сайдыытын саҥа стратегията оҥоһуллар, территориялары кэлим сайыннарыыга туһаайыы ылыллыбыт кэмигэр, тыа хаһаайыстыбатын сайыннарыыга саҥа стратегияны ылынар, саҥа бырагырааманы тобулар наада. Онон, быйыл тыа хаһаайыстыбатын сайдыытын концептуальнай боппуруостарын туспа көрөргө этии киллэрэбин. Инньэ гымматахпытына, дьаамаҕа түбэһиэхпит, XVI үйэҕэ англичаннар Иван Грознайтан Европаҕа бурдугу атыыга таһаарарга аан бастаан тыл көтөхпүт кэмнэрин саҕанааҕы курдук. ХХ үйэ саҕаланыытыгар үөскүү сылдьыбыт “бэйэбит сиэбэппит да буоллар, Европаҕа таһааран атыылыыбыт” диир балаһыанньа үөскүө суохтаах, — диэн Вячеслав Анатольевич этиитин түмүктээтэ.

Раиса Сибирякова.

СӨ Тыа хаһаайыстыбатын Министиэристибэтин Пресс-сулууспата.