361
10 января 2020 в 10:15
Күөх Ньурбаҕа саҥа тутуулар
Саҥа сылга бэрт сонуннаах үктэннибит дииллэр Ньурба улууһун олохтоохторо. Онтон икки үтүө түгэни быһа тардан кэпсиэхпин баҕарабын.
Антоновкаҕа саҥа спорт саалаата киирдэ
Антоновка сэлиэнньэтигэр ахсынньы 26 күнүгэр федеральнай бырагырааманан тутуллубут сүүнэ спортивнай комплекс үлэтин саҕалаата.
Спорткомплексы арыйыы үгэс курдук өрө көтөҕүллүүлээхтик ыытылынна. Аалай лиэнтэни улуус баһылыга Алексей Иннокентьев, СӨ спордун миниистирэ Иннокентий Григорьев, СӨ тутуу миниистирин солбуйааччыта Евгений Афанасьев, Октябрьскай нэһилиэк баһылыга Семен Корякин, “Барт-Строй” ХЭТ гендириэктэрэ Семен Капитонов уонна ДЮСШ дириэктэрэ Семен Федоров быһа кырыйдылар.
Бу бэлиэ түгэни “АЛРОСА” кубогар хапсаҕай күрэҕин ыытан киэргэттилэр.
Саҥа тутуллубут Октябрьскай нэһилиэк киэҥ-куоҥ уонна сырдык спорт комплексын түһүлгэтигэр 40 хапсаҕайдьыт күөн көрүстэ. Мирнэй, Бүлүү, Ньурба, Үөһээ Бүлүү улуустарыттан 5-тии киһилээх хамаанда кытынна. Ол иһигэр Бүлүү улууһа 2 уонна ньурбалар 4 хамаанданы туруордулар. 2 күннээх эрийсиилээх киирсии түмүгүнэн Ньурба бастакы хамаандата кыайыылаах таҕыста. Ньурба иккис хамаандата — 2-с, Бүлүү бастакы хамаандата — 3-с миэстэ буоллулар. Бириистэрин кыайыылаах хамаандаҕа СӨ спордун миниистирэ Иннокентий Григорьев 200 тыһ. солк., 2-с миэстэлээхтэргэ Ньурба улууһун баһылыга Алексей Иннокентьев 150 тыһ. солк. уонна 3-с миэстэлээх хамаандаҕа “АЛРОСА” АК култуура-спорт комплексын дириэктэрин солбуйааччыта, тренер Зелимхан Кцоев 100 тыһ. солк. туттардылар.
Маалыкай хаһаайкаларын үлэтин чэпчэтэн
Ньурба улууһун Маалыкай сэлиэнньэтигэр ааспыт сыл олус бэркэ ааста диэн олохтоохтор түмүк оҥороллор. Ол курдук, икки улахан социальнай эбийиэк тутуута саҕаламмыта – култуура киинин дьиэтин тутуута түмүктэнэн, быйыл кулун тутарга аанын тэлэччи аһара былааннанар. Ааспыт сайын муусука оскуолатын саҥа дьиэтин тутуута саҕаламмыт. Онон нэһилиэккэ уопсастыбаннай олох күөстүү оргуйар, дьон 2020 сылтан үгүс үчүгэй, кэрэ түгэннэри кэтэһэр.
Ааспыт сылы атаара өссө биир бэлиэ бачыым олоххо киирдэ. Ахсынньы 26 күнүгэр Маалыкай сэлиэнньэтигэр (Бордоҥ нэһилиэгэ) химчистка уонна таҥас сууйтарар өҥөлөөх дьиэ үлэҕэ киирдэ. Бу өҥөнү Саргылана Владимировна уонна Николай Николаевич Егоровтар арыйдылар. Элбэх оҕолоох Егоровтар Ньурба улууһун предпринимателлэрин өйүүр бырагырааманан бу дьоҕус бизнестэрин арыйар кыахтаммыттар. Ыал аҕата кэпсииринэн, бэйэлэрин дьиэлэрин таһыгар эргэ дьиэни өрөмүөннээн, уу ыытар ситими оҥорон, улахан баах туруоран, аныгылыы технологиялаах сууйтарар массыына туруорбуттар. Николай Николаевич Бордоҥ нэһилиэгин баһылыга Леонид Владимирович Ушкановка саҥа саҕалааһынын өйөөбүтүгэр махталын биллэрэр.
Маалыкай сэлиэнньэтин олохтоохторо чугастыы таҥас сууйтарар өҥө баар буолбутуттан үөрэллэр эрэ. “Тыа сирин олоҕун сиэринэн таҥаспытын илиибитинэн сууйа сылдьыбыппыт, билигин улахан таҥастары Егоровтар аспыт прачечнайдарыгар илдьэр буолуом, төһөлөөх абыраллааҕый?!”, — диир олохтоох Надежда Ефимовна.
Бу курдук, Ньурба улууһун кытыы сытар нэһилиэгэр олох күөстүү оргуйар, эдэр эрчимнээх уолаттарын көмөтүнэн нэһилиэк олоҕо чаҕылхай кыраасканан оонньуур, сэргэх өрүттэрэ элбиир.
Сардаана КУЗЬМИНА
