Томмот – Дьокуускай тимир суол бэлэмин быһаардылар

Бэс ыйын 19 к. анал хамыыһыйа үлэтин түмүктэринэн СӨ тырааныспарга уонна суол хаһаайыстыбатыгар министиэристибэтигэр Томмот – Дьокуускай (Аллараа Бэстээх) үлэҕэ киириэхтээх комплексы аһыыга бэлэми быһаарар аактаҕа илии баттаммыта. Онон Аллараа Бэстээх станцияҕа диэри тимир суолунан пассажирдары тиэйии аһылларыгар кэккэ кыра тэрээһиннэри быһаарыы хаалла.

Росжелдор Уһук Илиҥҥи сирдээҕи-уоттааҕы управлениетын салайааччытын солбуйааччыта Антон Малышев бэрэссэдээтэллээх тутар хамыыһыйа Саха сиригэр бэс ыйын 18 күнүттэн үлэлээбитэ. Бэс ыйын 19 к. хамыыһыйа Росжелдор Уһук Илиҥҥи управлениетын, Уһук Илиҥҥи инфраструктура дирекциятын Тындатааҕы отделын, “Саха сирин тимир суоллара” АХ” АУо, “Единая группа заказчика” ФГУП бэрэстэбиитэллэрин кытта Томмот – Дьокуускай (Аллараа Бэстээх) туһаайыытынан оробуочай поеһынан айаннаан, объектары көрдө. Хамыыһыйа чилиэннэрэ суол хаһаайыстыбатын, искусственнай тутуулары, СЦБ (сигналлааһын, о.д.а.) уонна сибээс, ол иһигэр тырааныспарга куттал суох буолуутун системаларын, энергиянан хааччыйар объектары көрүүнү ыытта, үлэ усулуобуйаларын сыаналаата, Аллараа Бэстээххэ пассажирдары хаачыстыбалаахтык хааччыйыыга анаан инфраструктураны бэрэбиэркэлээтэ. Учаастакка айан бириэмэтин бэрэбиэркэлиир уонна графигы толорууну бигэргэтэр туһугар бары учаастактарга айан олохтоммут кэминэн ыытылынна.

Ыспыраапка

Беркакит – Томмот – Дьокуускай тимир суол линиятын тутуу 1985 с. кулун тутарыгар саҕаламмыта. 2004 сыл атырдьах ыйыгар Нерюнгри-грузовая – Томмот учаастага үлэҕэ киирбитэ, пассажирдары тиэйии саҕаламмыта.
Томмот – Дьокуускай (Аллараа Бэстээх) тимир суол линиятын тутуу 2005 сылтан ыытыллар. 2014 сылга Томмот – Аллараа Бэстээх линиятын быстах кэмҥэ үлэлэтии саҕаламмыта.
2015 сылга генеральнай бэдэрээтчит – «Трансстрой» Инжиниринговай корпорация тутуу үлэтин тохтоппута. Суукка көрүүлэр кэннилэриттэн 2017 с. бүтэһигэр “Трансстрой” Инжиниринговай корпорация” САУо кытта судаарыстыба контрага көтүрүллүбүтэ.
2018 с. муус устар 10 к. куонкуруска кыайан генеральнай бэдэрээтчитинэн “Саха сирин тимир суоллара” АХ” АУо буолбута. Муус устар 21 к. Томмот – Дьокуускай (Аллараа Бэстээх) комплексы тутууга судаарыстыба контрагар илии баттаммыта.

Поезд Аллараа Бэстээх стан­циятыгар тохтообутун кэн­нэ хамыыһыйа чилиэннэрэ СӨ тырааныспарга уонна суол хаһаайыстыбатыгар министиэристибэтигэр аактаны илии баттааһыҥҥа кэллилэр. «Тимир суол үлэ саҕаланыытыгар төһө бэлэмин быһаарыыны сыал-сорук оҥостон, хамыыһыйа күнү толору үлэлээтэ. Биһиги иннибитигэр от ыйын 27 к. диэри Беркакит – Томмот – Дьокуускай линиятынан Аллараа Бэстээх станцияҕа диэри толору докумуонунан бигэргэммит айаны саҕалыырга сорук турар. Ити сорук толоруллар, биһиги график быһыытынан үлэлиибит. Тутуу үлэлэрэ номнуо бүттүлэр. Билигин саамай сүрүнэ – докумуону оҥоруу», – диэн бэлиэтээтэ «Единая группа заказчика» ФГУП директора Олег Туманян.

Бу регион тырааныспарга министиэристибэтигэр Томмот – Дьокуускай үлэҕэ киллэриллэр комплекс аһарга төһө бэлэмин быһаарар үлэни тутар хамыыһыйа аактата пассажирдары тиэйиини кытта линияны бастайааннай үлэҕэ киллэриигэ көҥүллүүр суолталаах докумуон буолар. Салгыы Росжелдор туһааннаах бирикээһэ тахсыа, итиэннэ Томмот-Аллараа Бэстээх учаастак станциялара аһыллыахтара.

«Билигин өрөспүүбүлүкэ тимир суол тырааныспарынан 5,5 мөл. тоннаҕа чугаһыыр таһаҕаһы тиэйэр. Биһиги ити кээмэйдэри сылга 8-10 мөл. тоннаҕа диэри улаатыннарыахпытын баҕарабыт. Онон инникитин элбэх үлэ күүтэр, ол эрээри бүгүҥҥү түгэн Саха сиригэр бүтүннүүтүгэр бэлиэ суолталаах. Бу историяҕа киирэр түгэн», – диэн СӨ тырааныспарга уонна суол хаһаайыстыбатыгар миниистирэ Александр Тарасов тыл эттэ.

Санаттахха, ахсынньы 24 к. Томмот — Аллараа Бэстээх тимир суол учаастагын үлэлэтиигэ техническэй өттүнэн бэлэмин быһаарыыга аакта илии баттаммыта. Ити кэнниттэн тутуллубут объект бырайыак докумуоннарыгар сөп түбэһэрин туһунан Ростехнадзор түмүгэ ылыллыбыта.

2014 сылтан бу учаастагы быстах кэмҥэ үлэлэтэр уонна Томмот – Аллараа Бэстээх комплексы тутууну түмүктээбит «Саха сирин тимир суоллара» АХ бастайааннай үлэлэтии режимигэр бэлэм. Клиеннэри хаачыстыбалаах өҥөлөрүнэн хааччыйыыны тэрийэр, тариф политикатын, дуогабарынан үлэни  быһаарар сыалтан от ыйын бастакы күннэригэр өрөспүүбүлүкэ тэрилтэлэрин кытта киэҥ ыҥы­рыылаах мунньаҕы ыытыы былааннанар.

Объектары кэрийэн көрүү

Бэс ыйын 28-29 күннэригэр СӨ Бырабыыталыстыбатын Бэрэссэдээтэлин бастакы солбуйааччы Алексей Колодезников “Саха сирин тимир суоллара” Акционернай хампаанньа объектарын кэрийэн көрдө.

Кини үлэтин бастаан Аллараа Бэстээх станциятын объектарыгар сылдьыыттан саҕалаата. “Саха сирин тимир суоллара” АХ” АУо генеральнай директора Василий Шимохины кытта кинилэр Аллараа Бэстээх станцияттан Олень станцияҕа диэри пассажирдары тиэйэр вагоҥҥа айаннаатылар.

Ити кэннэ Алексей Колодезников Алдаҥҥа тимир суол вокзалыгар уонна Алдан станцияҕа локомотив депотугар сырытта.
Локомотив депотун көрөр кэмҥэ Василий Шимохин хампаан­ньаҕа локомотив пааркатын саҥардыы түмүктэрин уонна экономикаҕа ылыллыбыт көдьүүһүн туһунан иһитин­нэрдэ. Итини сэргэ кини сылтан сыл аайы тепловозтар сүрүн уонна көмө оборудованиеларын өрөмүөннээһин саҥа көрүҥнэрин баһылыылларын бэлиэтээтэ, ол үгүс өттө урут атын тэрилтэлэргэ оҥоһуллара. Билигин тепловозтар электродвигателлэрин өрөмүөннээһин технологиятын баһылаабыттарын түмүгэр, локомотив пааркатыгар үлэ хаачыстыбаннай көрдөрүүлэрэ балайда тупсубуттар.

Тимир суолу бастайааннай үлэҕэ аһар туһунан бирикээс таҕыста

Тимир суол тырааныспарын федеральнай агентствота Томмот – Дьокуускай (Аллараа Бэстээх) уопсай туһаныллар тимир суолу бастайааннай үлэҕэ аһыы туһунан 270№-дээх бирикээһи таһаарда.

Бу бирикээс тимир суол тырааныспарын феде­ральнай агентствотын үлэни тутар хамыыһыйатын аактатын төрүтүгэр илии баттанна. ФАЖТ Админис­тративнай регламеныгар сөп түбэһиннэрэн Аллараа Бэстээх станциятыгар диэри таһаҕаһы уонна пассажир­дары тиэйиигэ быһа сылдьыһыыны тэрийиигэ түмүк быһаарыынан 4№-дээх Тариф хомуурунньугунан (Тарифное руководство) коммерческай операциялары толо­рууга станциялары аһар туһунан бирикээскэ илии баттаныаҕа. Манна даҕатан эттэххэ, от ыйын 27 к. Алла­раа Бэстээх станциятыттан пассажирдары тиэйии аһыл­лыытын кытта сибээстээх үөрүүлээх тэрээһиннэр былаан­наммыттара.

 Елена БАИШЕВА бэлэмнээтэ