Сталинград кыргыһыытыгар кыттыбыт буойуннар кэриэстэригэр

Аҕа дойду Улуу сэриитигэр Кыайыы 75 сылыгар өрөспүүбүлүкэ бар дьонун депутаттара уонна Ил Түмэн аппараатын үлэһиттэрэ бэйэлэрин тус харчыларыгар “Саха сирин буойуннара Сталинград кыргыһыытыгар. 1942 с. от ыйын 17 күнэ – 1943 с. олунньу 2 күнэ” кинигэни бэчээккэ бэлэмнииллэр.

Кинигэни Саха сирин Национальнай архыыбын сүрүн археограба, РФ култууратын үтүөлээх үлэһитэ, СӨ норуотун хаһаайыстыбатын үтүөлээх үлэһитэ, Россия бочуоттаах архыбыыһа Александр Калашников хомуйан оҥорор. «Кинигэ киэҥ ааҕааччыга кэрэхсэбиллээх буолуо диэн эрэнэбит, манна военачальниктар Георгий Жуков, Константин Рокоссовскай, Василий Чуйков, Михаил Шумилов ахтыылара, РФ Оборонаҕа министиэристибэтин Киин архыыбын фондаларыттан докумуоннар, ветераннар ахтыылара, Сталинград кыргыһыытыгар кыттыбыт дьон туһунан ыстатыйалар киириэхтэрэ», – диир кини.

Ураты болҕомто Сталинград, Мамаев курган кыргы­һыыларыгар тыыннарын толук уурбут Саха сирин буойуннарын, СӨ Өйдөбүнньүк Кинигэтигэр киллэриллибэтэх Сталинград кыргыһыытын кыттыылаахтарын, “Сталинграды көмүскээһин иһин” мэтээлинэн наҕараадаламмыттар  испииһэктэригэр уурулунна.

Улуу Кыайыыга Саха сирин дьонун кылаатын туһунан кинигэни таһаарарга этиини СӨ Ил Түмэнин ветераннара парламент салалтатын кытта Кыайыы 74 сылыгар анаммыт үгэс буолбут көрсүһүүлэригэр иһитиннэрбиттэрэ.

Судаарыстыбаннай Мунньах (Ил Түмэн) бэрэссэдээтэлэ Петр Гоголев көҕүлээһининэн Сталинград куораты көмүскэспит Саха сирин буойуннарын туһунан кинигэ бастакынан таһаарыллыаҕа. Чуолаан, Волгаҕа кыргыһыыга сэбиэскэй сэриилэр стратегияны өстөөхтөн ордук толкуйдаан, сэрии хаамыытыгар тосту уларыйыыны саҕалыыллара кыаллыбыта. Спикер этиитин норуот депутаттара уонна парламент аппараатын үлэһиттэрэ өйөөбүттэрэ.

«Өрөспүүбүлүкэ Баһылыга Айсен Николаев “Эһиги хорсун быһыыгыт кэлэр көлүөнэлэр сүрэхтэригэр” Улуу Кыайыы Сылын биллэрэр туһунан Ыйааҕын олоххо киллэрии чэрчитинэн биһиги итинник быһаарыыны ылыммыппыт», – диэн иһитиннэрдэ парламент бэрэссэдээтэлэ Петр Гоголев.

Парламент аны Москваны көмүскээһин – Кашира, Ржев анныгар кыргыһыыларга, Японияны кытта сэриигэ кыттыбыт, фашистскай Германия концлааҕырдарыгар аад айаҕар өлөр өлүүнү көрсүбүт Саха сирин буойуннарын туһунан таһаарар былааннаах. Олору Национальнай архыып бэлэмнээбитэ, онон бэчээттэнэллэрэ хаалла.

Ил Дархан биллэрбит Сомоҕолоһуу сылыгар кинилэр бачыымнарын өйүөхтэригэр, ол түмүгэр Улуу Кыайыы 75 сылыгар хаалбыт кинигэлэр бары күн сирин көрүөхтэригэр Ил Түмэҥҥэ эрэнэллэр.

Кинигэ толору ис хоһоонноох уонна чахчыларга олоҕурбут буоларын туһугар Саха сирин парламена өрөспүүбүлүкэ бары олохтоохторуттан, Сталинграды көмүскэспит буойуннар аймахтарыттан  бэйэлэрин дьоннорун туһунан ахтыыларын үллэстэллэригэр көрдөһөр.

Иһитиннэриилэри уонна билсиһэр төлөпүөннэри СӨ Судаарыстыбаннай Мунньаҕын (Ил Түмэн) электроннай аадырыһыгар: gs@iltumen.ru «За Сталинград! За Родину!» диэн бэлиэ суруктаах ыытар наадалаах.