Өйөбүл атын көмөттөн тутулуга суох оҥоһуллуохтаах

Норуот депутата Мария Христофорова “Кыым” хаһыакка “Сэрии оҕолоро” диэн ыстатыйатыгар сэрии сылларын оҕолорун туһунан сокуону үчүгэйдик дьүүллэһэн уонна ырытыһан баран, Ил Түмэн бэс ыйынааҕы сессиятын көрүүтүгэр киллэриэхтээхтэр диэн сабаҕалыыбын.

Хотугу улуустарга олорор сэрии оҕолоро ыраах уонна сырыы суох буолан өрөспүүбүлүкэ хаһыаттарыгар бу сокуону ырытыһыыга маассабайдык кыттыбаттар. Биһиги ийэлэрбит, аҕаларбыт, эбэлэрбит, эһэлэрбит, эдьиийдэрбит, убайдарбыт сэрии ыар сылларыгар тыылга сэрии дуораанын истэ сылдьан Кыайыыны уһансыбыттара уонна ол да кэнниттэн дойду экономикатын чөлүгэр түһэриигэ ыарахаттары тулуйан үлэлээбиттэрэ. Ол курдук, Улуу Кыайыыны ситиспиттэрин чиэстээн, ытык дьоммут туһугар “Сэрии сылларын оҕолорун туһунан”  өрөспүүбүлүкэ сокуонун ылыммыппыт кэрэхсэбиллээх. Биһиги, сэрии сылларын оҕолоро, уоттаах сэриигэ тыыл-үлэ фронугар ыарахан усулуобуйалары тулуйан, улахан дьону кытта тэҥҥэ үлэлээн көмө буолбуппут. Өрөспүүбүлүкэ маҥнайгы президенэ Михаил Николаев салайар кэмигэр Аҕа дойду Улуу сэриитин саҕанааҕы эдэр ыччаттар, ол иһигэр сокуоннай саастарын туола илик оҕолор улахан дьону кытта үлэ араас салааларыгар үлэлээн күүс-көмө буолбуттарын үрдүктүк сыаналаан, 1935 сыллаахха диэри төрөөбүттэргэ тыыл, үлэ ветерана үрдүк ааттара иҥэриллибиттэрэ. Ити курдук биһиги өрөспүүбүлүкэбитигэр сэрии сылларыгар көхтөөх кыттыыны ылбыт эдэр ыччаттар, ол иһигэр сокуоннай саастарын туола илик оҕолор килбиэннээх үлэлэрин иһин мэтээллэринэн наҕараадаламмыттара.

Билигин Аҕа дойду Улуу сэриитин оҕолоро — 75-80 саастарын ааспыт үлэ ветераннара күнтэн-күн, сылтан-сыл сааһыран, доруобуйаларынан олохтон туораан аҕыйыы тураллар. Кинилэр аҕа көлүөнэ дьону кытта бииргэ Улуу Кыайыыны ситиһэргэ сыраларын уурбуттара. Кыайыы кэнниттэн урусхалламмыт дойдуларын, холкуостарын, собуоттарын, фабрикаларын чөлүгэр түһэриигэ күүс-көмө буолбуттара, биэс сыл иһигэр баараҕай былааннары толорбуттара. Бааһырбыт сир кырыһа оспута, ГЭС-тэр, атомнай станциялар, тимир суоллар тутуллубуттара, бырамыысыланнаска, тыа хаһаайыстыбатыгар, онтон да атын салааларга үрдүк таһаарыылаахтык үлэлээбиттэрэ. Ити курдук биһиги Сахабыт сиригэр эмиэ сэрии сыллааҕы көлүөнэ хара көлөһүнүн тоҕон олоҕу чөлүгэр түһэрбитэ. Ол иһин норуот депутаттара “Сэрии сылларын оҕолорун туһунан” өрөспүүбүлүкэ сокуонун ылыммыттарын биһирээн туран, “Ил Түмэн” хаһыакка бу курдук санаабын этэбин. Сокуоҥҥа этиллэр сэрии сылларын оҕолоругар, атын социальнай төлөбүрдэрин ылалларыттан тутулуга суох, ый аайы этиллибит үбүнэн көмөнү социальнай көмө быһыытынан биэрэллэрэ наада. Ол үп кээмэйэ 1000 солк. быһыылааҕа. Маны таһынан өрөспүүбүлүкэ территориятыгар 80 саастарын туолбут ытык кырдьаҕастарга общественнай тырааныспарынан босхо айаны социальнай көмө быһыытынан киллэрэллэрэ буоллар. Сокуону хаттаан көрөллөрүгэр бу икки этиибин учуоттууллара буоллар диэн баҕа санаалаахпын.

Василий Христофоров, Өлөөн бочуоттаах олохтооҕо,

СӨ үтүөлээх ветеринарнай бырааһа