Саха сирэ Өлүөнэни туоруур муоста бырайыагын билиһиннэрдэ

Саха сирин Баһылыгын э.т. Айсен Николаев Илиҥҥи экономическай форумҥа Өлүөнэ өрүһү туоруур муостаны тутуу бырайыагын билиһиннэрдэ. «Саха сиригэр бастакы суолталааҕынан тырааныспар инфраструктуратын сайдыыта буолар, онон Өлүөнэни туоруур муоста – бу тыын суолталаах бырайыак. Бүгүҥҥү күҥҥэ өрөспүүбүлүкэ сирин-уотун 8% эрэ сылы эргиччи тырааныспарга тииһинии зонатыгар баар”, — диэтэ Николаев.

Өлүөнэ өрүс сүүрүгүн хоту, Иркутскай уобаласка баар Осетровотааҕы муостаттан ураты, биир да муоста суох. Өлүөнэни туоруур муоста Дьокуускай оройуонугар логистика киинин үөскэтэр кыаҕы биэриэҕэ, онно үс федеральнай маршрут холбоһуохтаах — тимир суол, өрүс уонна авиация тырааныспара, ону сэргэ регионнааҕы массыына суоллара тиксэллэр. Бырайыак олоххо киириитин түмүгэр региоҥҥа таһаҕаһы тиэйии сыллааҕы кээмэйэ үс төгүл үрдээн, 6 мөл. тоннаҕа тэҥнэһэрэ сабаҕаланар. “Өлүөнэни туорааһын: Быһаарар суоллар” норуоттар икки ардыларынааҕы конференция экспердэрэ муостаны тутуу муҥутуур сыанатын 70-80 млрд солк. сыаналаабыттара, диэн Айсен Николаев этиитин ТАСС аҕалар.

Кини тылыгар сигэннэххэ, муоста Дьокуускайы дойду атын сирдэрин кытта сибээстиирин ааһан, өрөспүүбүлүкэ улахан зонатын Россия тырааныспарын тиһигин кытта сибээстиир сүһүөҕүнэн буолуохтаах.

Илиҥҥи экономическай форум кэмигэр Саха сирин бырабыыталыстыбата, «УК “ВИС”» АУо уонна China Railway Construction Corporation Өлүөнэ өрүһү туоруур муостаны тутуу боппуруоһугар бииргэ үлэлиир туһунан меморандумҥа илии баттаатылар. Өрөспүүбүлүкэ өттүттэн меморандумҥа регион баһылыгын э.т. Айсен Николаев, «УК “ВИС”» АУо-тан — генеральнай директор Игорь Снегуров, CRCC-China Railway Bridge Bureau Group Co., Ltd корпорацияттан — директордар Сэбиэттэрин бэрэссэдээтэлэ У Цзяньшунь илии баттаатылар.

«Биһиги концессионнай көҕүлээһин барыйаанын дьүүллэспиппит, ол барыбытыгар балайда кэрэхсэбиллээх. Атын да этиилэри ыларга бэлэммит – билигин номнуо хас да консорциум бэйэлэрин этиилэрин бэлэмнии сылдьаллар. Бастакынан билигин China Railway Construction Corporation (CRCC) буолла. Атын хампаанньалар маннык этиини оҥордохторуна, олору, биллэн турар, үөрэтиэхпит», — диэтэ Николаев.

СӨ Бырабыыталыстыбатын пресс-сулууспата чопчулаабытынан, CRCC «Кытай тимир суолу тутар бөдөҥ хампаанньата, билигин Россияҕа Москва уонна Санкт-Петербург метрополитеннарын бырайыактарыгар үлэлиир».

Өрөспүүбүлүкэ баһылыга ТАСС корреспонденын кытта кэпсэтиигэ концессия көҕүлээһинигэр бэйэтин этиилэрин Кытай PowerChina International Group Ltd. (Sinohydro Corporation Limited) хампаанньата билиһиннэрэр былааннааҕын иһитиннэрдэ. Сыл анараа өттүгэр ВЭФ-2017 чэрчитинэн, Саха сирин былаастара Өлүөнэни туоруур муостаны тутуу бырайыагын ити хампаанньа бэрэстэбиитэллэригэр билиһиннэрэр соруктаахтарын туһунан иһитиннэриллибитэ. «Билигин кини этии бэлэмниир. Бүгүҥҥү күҥҥэ биһиги биир структураҕа тохтообоппут. Ким бастакынан, Россия сокуоннарын кытта сөп түбэһиннэрэн сөптөөхтүк, экономическай өттүнэн ордук барыстаах этии оҥордоҕуна, ол этиини биһиги бүтэһиктээхтик бэлэмнээн, дойду салалтатын көрүүтүгэр таһаарыахпыт», — диэтэ Николаев, маныаха кини Япония хампаанньалара эмиэ бырайыакка интэриэстээхтэрин эбэн эттэ.

Муостаны таһынан, Саха сирэ форумҥа атын бырайыактары көрдөрдө, чуолаан, Кангаласска “кэлэр кэм бөһүөлэгин” тутуу бырайыагын. Онно оҥорон таһаарар кластердардаах, офистардаах, научнай кииннэрдээх, рекреационнай уонна үөрэтэр инфраструктуралаах уонна олорор кыбартааллардаах оройуону үөскэтэр былаан баар. Бырайыакка инвестиция кээмэйэ 3,25 млрд солк. тэҥ.

Бырайыактары билиһиннэрии РФ Уһук Илин сайдыытыгар министиэристибэтин стендэтигэр буолан ааста.

СИА, ТАСС матырыйаалларынан.