Мииринэй Арыылааҕар инбэлииттэр ыһыахтара

Биһиги, Мииринэй оройуонугар олорор араас омуктар, бары иллээх-эйэлээх биир дьиэ кэргэн курдук үлэлии-үөрэнэ, түмсэ сылдьабыт.

Айылҕа муҥутуур күүһүн-уоҕун биэрэр күннэриттэн биирдэстэригэр Арыылаах түөл­бэтигэр ыһыах ыһар ытык сирдэригэр күөлүнэн хаймыыламмыт күөх суугунуур мастаах ырааһыйаҕа хас сыл аайы ыытыллар инбэлииттэр  ыһыахтара буолла. Маны сүүрэн-көтөн сахалыы тыыннаан инбэлииттэр уопсастыбаларын бэрэссэдээтэлэ Хлебодарова Ирина Борисовна уонна кини солбуйааччыта Щука Елена Александровна, көмөлөһөөччүтэ Щегорцев Андрей Анатольевич, Генеров Игорь Олегович ыыттылар. Алгыһыттан, оһуохайыттан саҕалаан барыта сахалыы оонньуулар, курэхтэһиилэр буоллулар. Манна алгысчыт Саввинов Семен Семенович сахалыы саҥа оонньуу тэрийдэ, ыалдьыттар да хаалсыбакка күрэхтэстилэр. Сахалыы таҥас күрэҕэ үрдүк таһымнаахтык ааста диэххэ наада, ыарыы диэни умнан, иис абылаҥар ылларан, дьон кутун-сүрүн тутан улахан биһирэбили ыллылар.

Самаан сайыны көрсө, саамай үчүгэй бырааһынньыкка — ыһыахха кэлэн үөрэ-көтө сырыттыбыт. Сылын аайы Инбэлииттэр уопсастыбалара тэрийэр ыһыаҕар нэһилиэктэр олус көхтөөхтүк тэринэн кэлэллэр. Быйылгы ыһыах Арыылаах бөһүөлэгэр дьиҥ сахалыы ыытыллыбыта эмиэ туспа ураты эйгэни үөскэттэ. Инбэлииттэр уопсастыбаларын бэрэссэдээтэлэ, өр  кэмҥэ 1988 сыллаахтан үлэлиир Ирина Борисовна Хлебодарова итини барытын тэрийэн ыытта. Арыылаах бөһүөлэгин баһылыга Николай Иванович Григорьевка күүс-көмө, тирэх  буолбутугар улаханнык махтанабыт! Чөл олохтоох, сырдык санаалаах, дьоллоох буолуҥ диэн үтүө тылбытын, алгыспытын аныыбыт!

Ыһыах тэрээһинигэр куруутун кыттар нэһилиэгинэн  Таас Үрэх буолар,  Татьяна Дормидонтовна Еремеева  24-с сылын социальнай үлэһитинэн үлэлиир, 7 төгүл олохтоох сэбиэт депутатынан талыллан үлэлээбитэ, дьону түмэр дьоҕурдаах буолан оройуон тэрээһинигэр барытыгар кытталлар.

Татьяна Дормидонтовна Бэчинчэ нэһилиэгэр Ленскэй оройуонугар төрөөбүтэ. Таас Үрэх олохтооҕор Иванов Юрий Никитичка кэргэн тахсан,  быйыл холбоһон олорбуттара 50 сылын бэлиэтээтилэр, түөрт оҕолорун үөрэхтээн, үлэһит үтүөтэ буоллулар.

Кини истиҥ тылларынан куруук бииргэ үлэлээбит Таас Үрэх баһылыктарын Н.И.Даниловы, В.В.Потаповы, Д.Д.Петрову ахтар.

Сахалыы оонньуулары, спортивнай күрэхтэһиилэри аан бастакынан Мииринэй оройуонугар 1992 сылтан инбэлииттэр уопсастыбаларын бэрэссэдээтэлэ Хлебодарова Ирина Борисовна ыыппыта. Ирина Борисовна сахалыы куттаах, араас омуктары бу үлэлиир кэмигэр өйөөтө, түмтэ, кини сыралаах үлэтин чиэстээннэр, итини элбэх наҕараадалара туоһулууллар.

Мииринэй оройуонугар, рес­пуб­ликатааҕы тэрээһиннэргэ, дьаһалларга куруук көмө-тирэх буолар Ботуобуйа нэһилиэгин баһылыгар Зоя Христофоровна Даниловаҕа дьон-сэргэ махтала улахан. Куруук спонсордыыр тэрилтэлэрбитигэр, ол курдук ИП Валентина Васильевна Давыдоваҕа, «РНГ» АУо  хампаанньа муниципальнай тэрилтэлэри кытта үлэҕэ салайааччытыгар Дмитрий Олегович Пискуновка эмиэ махтанабыт.

Инбэлииттэр ыытар тэрээ­һиннэрэ, туруорсуулара, дьоҥҥо көмөлөрө куруук үрдүктүк сыаналанар, болҕомтоҕо ылыллар, хаһан даҕаны түмүгэ суох хаалбат. Биһиги бары махтанабыт Ирина Борисовнаҕа, кини көмөлөһөөччүлэригэр Елена Александровнаҕа, Андрей Анатольевичка уонна Мииринэй оройуонун баһылыгар Ришат  Нургалиевич Юзмухаметовка.

Инникитин даҕаны инбэлииттэр уопсастыбаларыгар ыл­­лыктаах буоллун ыраҕыт, кэс­киллээх буоллун кэтэһэргит, тирэхтээх буоллун тирэнэргит, олохтоох буоллун оҥорбуккут диэн баҕарыахпыт этэ.

Ыһыах кыттыылаахтара санааларын үллэстэллэр

Ыһыахха сылдьыбыт уонна кыттыбыт дьоннорбут бэйэлэрин санааларын тиэрдэллэр.

Долгуура, Сүлдьүкээр олохтооҕо:

— Биһиги, “Алаас хотуна” хамсааһын кыттыылаахтара, Арыылаах бөһүөлэгэр ыытыллар инбэлииттэр үгэс буолбут ыһыахтарыгар сырыттыбыт. Садын национальнай эбэҥки нэһилиэгиттэн саха национальнай ытык ыһыаҕын ыһарга сыл аайы кыттабыт. Үгүс араас омуктар түмсэн олорор интернациональнай диэн ааттанар Мииринэй оройуонун төрүт олохтоохторо, Сүлдьүкээр эбэҥкилэрэ, бэйэбит культурабытын атын норуоттарга билиһиннэрэр ытык иэспит буолар. Мииринэй оройуонун культура отделын линиятынан ыытыллар араас көрсүһүүлэргэ хото кыттабыт. Быйыл атырдьах ыйын 17 күнүгэр Крымҥа ыытыллар Аан дойду норуоттарын фольклордарыгар аналлаах тэрээһиҥҥэ бараары бэлэмнэнэ сылдьабыт. Күндү биир дойдулаахтарбар дьолу-соргуну, доруобуйаны баҕарабын.

Үрдүгүтүнэн үргүөр үргүйбэтин,

Анныгытынан аргыар аргыйбатын

Дом!

Николаева Дария Егоровна, Чернышевскайтан үлэ ветерана:

— Я  приехала в поселок Чернышевский на строительство Вилюйской ГЭС по комсомольской путевке из Якутска в 1964 году в конце августа. Приняли меня в управление механизации трактористом. Работали по 10 часов без выходных, учились в вечерней школе, потом в учкомбинате училась на машиниста башенного крана и работала на створе строительства ВГЭС. У меня одна дочка. Работает в республиканской прокуратуре. Внук Алексей. Они живут в Калининграде. За участие в строительстве ВГЭС наградили медалью “За трудовое отличие”.

В 1975 году ноябре-месяце перенесла кровоизлияние головного мозга и  перенесла операцию в 1976 году. Стала инвалидом 2 группы.

Бурцева Мария Николаевна:

— Мин манна 1992 с. кийиит буолан кэлбитим. Бэйэм Советскай былаас эрдэҕинэ иис, закройщик идэтин ылан билиҥҥэ дылы иистэнэ сылдьабын, тугу барытын тигэбин: түүлээҕи, тыс этэрбэһи, сахалыы таҥаһы. Кэлэн баран “Туой Хайа” культура дьиэтигэр костюмерынан, онтон пенсияҕа тахсан баран оскуолаҕа харабылынан үлэлээбитим. Ол үлэлии сылдьан үлэҕэ травмаламмытым. Элбэх грамоталаахпын, махтал суруктаахпын, сыл ахсын араас куонкурустарга кыттан үрдүк биһирэбили ыла сылдьабын. Ансамбльга ыллыыбын, үҥкүүлүүбүн. Ииспин олох ордоробун. Биир уоллаахпын, быйыл сиэн бэлэхтээтэ, онон көтүөххэ кынат суох.

Марина Михайлова, “Северянка” ансаамбыл бэрэстэбиитэлэ:

— Ансамбль тэриллибитэ 20-чэ сыл буолла “Туой Хайа” ДК иһинэн үлэлиир, сахалыы уонна нууччалыы ырыалары ыллыыбыт. Биһиги көстүүммүтүн олох бэйэбит тиктэн сылдьабыт. Араас нүөмэрдэри бэлэмнээн дьон сэҥээриитин ылабыт. Биһиги испитигэр солисткабыт, “Золотой голос АЛРОСА” ааты ылбыт Корчикова Галина Иннокентьевна баар. Уопсайынан, элбэх титуллары ылбыппыт, ол курдук быйыл Россия Федерациятын тэрээһинигэр 1-кы истиэпэннээх лауреат аата иҥэрилиннэ. Бу улахан ситиһиибит. Аҕа саастаахтарга киирсэбит (64-74). Ыһыахтарга, бэйэбит Мииринэй оройуоммут оонньуутугар барытыгар кыттабыт. “Туой Хайа” культура дьиэтин тэрээһиннэригэр барытыгар кыттан эдэр көлүөнэҕэ холобур көрдөрөбүт. Эдэр оҕолор биһигини ытыктыыллар.

Протодьяконова Алена Петровна, оҕо эрдэҕиттэн 2-с группалаах инбэлиит:

— Оройуон инбэлииттэрин ыһыаҕа Арыылаах бөһүөлэгэр буолан ааста.

Тэрээһинэ сыл аайы тупса турар, киһи, кыттааччы элбэх. Сахалыы таҥаска, ырыаҕа-тойукка куонкурустар хайа да сыллааҕар үрдүк тэрээһиннээхтик ыытылыннылар.

Мустубут дьон бары астынныбыт, үөрдүбүт. Маннык тэрээһини көҕүлээн, салайан ыытарыгар Ирина Борисовна Хлебодароваҕа кэлэр өттүгэр ситиһиилэри баҕарабыт.

Оксана Баишева, Светлана Егорова Мииринэй оройуона