Туймаада ыһыаҕар бэлэмнэнии хаамыыта

YAKUTIA.INFO. Бэс ыйын 14 к. Дьокуускай куорат баһылыгын э.т. Владимир Федоров бэс ыйын 29-30 кк. Үс Хатыҥҥа буолуохтаах ыһыахха бэлэмнэнии үлэлэр хаамыыларын көрдө.

Владимир Федоров кэпсээби­тинэн, быйыл Үс Хатыҥҥа быраа­һынньык күннэригэр илии суунар сирдэр, ыскамыайкалар туруоруллуохтара, санитарнай туочукаларга туалет кумааҕыта, анал турар миэстэлэр баар буолуохтара.
«Якутдорстрой» ууну тиэйиини хаач­чыйыаҕа, сири-уоту кэмиттэн кэмигэр уунан ыстарыллыаҕа, ити үлэҕэ 20-тэн тахса техника тахсыа. Уокурук администрациятын үлэһиттэриттэн састааптаах штаб уонна комендатура бииргэ бэрээдэги хааччыйыахтара», – диэтэ кини.
Өрөбүл күннэргэ быраабы харыстыыр уорганнар үлэһиттэрин кытта көрсүһүүлэргэ арыгыны көҥүлэ суох атыылааһыҥҥа хонтуруолу күүһүрдэргэ быһаарылынна. Бу сыалтан эбии камералар туруоруллуохтара. Ону сэргэ миэстэтигэр тырааныспар киириитэ хааччахтаныаҕа.
«Хааччыйар техникаттан уонна өрөспүүбүлүкэ баһылыгын, куорат баһылыгын массыыналарыттан ураты атын массыыналар киириилэрэ кытаанахтык хааччахтаныаҕа. Массыына турар сирдэригэр үлэни күүһүрдүөхпүт, киириигэ волонтердар тырааныспар айанын сүрүннүөхтэрэ», – диэтэ баһылык эбээһинэһин толорооччу.
«Национальнай бырааһынньыгы ыытыыга сир-уот бэлэмэ бүгүҥҥү күҥҥэ 80 %. Түһүлгэни бэлэмнээһин былаан быһыытынан барар, кэлэр нэдиэлэҕэ куорат ыалдьыттары көрсөргө толору бэлэм буолуоҕа», — диэн түмүктээтэ Владимир Федоров.

Дьокуускай к. уопсастыбаннаһы кыт­та сибээстэргэ уонна сонуну тарҕатар ситимнэри кытта үлэҕэ Департаменын матырыйаалынан.