Ыһыаҕы тэрийээччилэри кытта көрсүһүү

Бу тэрээһиҥҥэ өрөспүүбүлүкэ норуотун депутаттара, Ил Түмэн ветераннара, муниципальнай оройуоннар уонна куорат уокуруктарын баһылыктара, баһылыктар солбуйааччылара, депутаттар улуустааҕы, куораттааҕы сэбиэттэрин бэрэссэдээтэллэрэ, “Олоҥхо Ассоциацията” өрөспүүбүлүкэтээҕи общественнай тэрилтэ филиалларын, Олоҥхо Дьиэлэрин салайааччылара, эппиэттээх сэкирэтээрдэрэ, Алдан оройуонун тэрилтэлэрин салайааччылара уонна бочуоттаах ыалдьыттара кытыннылар.

Ил Түмэн спикерэ Александр Жирков ыалдьыттары ыһыаҕынан эҕэрдэлээн, Алдан сиригэр ыһыах табыллыбытын, бу бырааһынньыгы ыытарга анаан бэртээхэй миэстэ талыллыбытыттан саҕалаан ханна барытыгар көстөрүн бэлиэтээтэ, итини кытта бырааһынньык ыалдьыттара уонна кыттыылаахтара сөбүлэһиэхтэрэ диэн эрэллээхтик этэргэ төрүөт баарыгар болҕомтону тарта.

“Алдан оройуона” МО баһылыгын бастакы солбуйааччы Расиль Халиуллин ыалдьыттары уонна тэрийээччилэри кытта кэпсэтииттэн, үлэҕэ ким да туора туран хаалбатаҕа көстөрүн бэлиэтээтэ. Ол курдук, өрөспүүбүлүкэ уонна оройуон тэрийэр кэмитиэттэрин, тэрилтэлэр салайааччыларын, үлэһиттэрин, Алдан оройуонун олохтоохторун түмсүүлээх, тэрээһиннээх үлэлэрин түмүгэр күүтүллүбүт түмүк ситиһиллибитин итиэннэ салгыы Ыһыаҕы ыытыы Алдан сиригэр үтүө үгэһинэн буолуоҕун эттэ. Расиль Халиуллин Ил Түмэн спикерэ, Олоҥхо иккис уон сылын ыытыыга Национальнай тэрийэр кэмитиэт бэрэссэдээтэлэ улахан өйөбүлүн уонна көмөтүн иһин махталы биллэрдэ. “Алдаҥҥа Олоҥхо ыһыаҕын ыытыы тоҕоостооҕун туһунан мөккүөрдээх боппуруос быһаарыллар кэмигэр Александр Николаевич туруулаһан биһигини өйөөтө”, — диэтэ оройуон баһылыгын бастакы солбуйааччыта.

“Саха сирин соҕуруу өттүнээҕи электрическэй ситимнэр” ААУо генеральнай директора Игорь Шкурко бу кыһыл көмүстээх сиргэ олорбуттарын тухары маннык кэрэ, бэртээхэй бырааһынньык буола илигин туһунан икки күн устатыгар Алдан олохтоохторуттан элбэх сөҕөр-махтайар тыллары истибитин туһунан санаатын үллэһиннэ. Кини төрүт олохтоох дьон ааттарыттан Ыһыаҕы бары тэрийээччилэргэ, кыттыылаахтарга махталы эттэ.

“Еловское Транстрой” ХЭТ генеральнай директора, өрөспүүбүлүкэ норуотун депутата Александр Дудников саха национальнай култууратын эдэр ыччат өрө тута сылдьара барыларын итэҕэппитин бэлиэтээтэ уонна биһиги элбэх национальностаах өрөспүүбүлүкэбит ыччата бэйэтин норуотун ураты култууратын кичэллээхтик харыстыырыгар  уонна сайыннарарыгар баҕарда. Норуот депутата бу икки күннэргэ Алдан оройуонугар биир саамай күндү баайы – Олоҥхону – булбуттарынан   мустубут дьону эҕэрдэлээтэ.

Судаарыстыбаннай сулууспа ветерана, СӨ норуотун хаһаайыстыбатын үтүөлээх үлэһитэ, суруйааччы Дмитрий Наумов 1632 сылтан саҕалаан бу сиргэ биһиги, уруулуу куттаах Саха сирин дьоно, олоробут, ол да иһин Олоҥхо Ыһыаҕа эбэҥки сиригэр буолан ааста диэтэ.

“Полюс Алдан” АУо генеральнай директора, 2018 сыллааҕы Олоҥхо ыһыаҕын  генеральнай спонсора Алексей Носков бэлиэтээбитинэн, сүрдээх улахан үлэ ыытылынна, хас биирдии киһи бу бырааһынньыкка дууһатын, сүрэҕин баҕатын ууран үлэлээтэ. “Александр Николаевич, Эн бырааһынньык уруулун тутан турбуккун билэбин. Улахан баһыыба!”, — диэн Алексей Носков Ил Түмэн спикеригэр махтанна.

“Нерюнгри оройуона” МО баһылыга Виктор Станиловскай норуоттар култуураларын бырааһынньыга Саха сирин соҕуруу өттүттэн саҕалаан хоту хонноҕор тиийэ өрөспүүбүлүкэ олохтоохторун  түмпүтэ олус суолталааҕын этэн туран, Олоҥхо ыһыаҕа үрдүк таһымнаахтык ыытыллыбытынан алданнарга махтанна, чэчирии сайдыыны, этэҥҥэ буолууну баҕарда.

СӨ Хоту сирин аҕыйах ахсааннаах төрүт олохтоох норуоттарын Ассоциациятын старейшиналарын Сэбиэтин бэрэссэдээтэлэ, СӨ норуотун хаһаайыстыбатын үтүөлээх үлэһитэ, Алдан оройуонун бочуоттаах гражданина Августа Марфусалова норуоттар доҕордоһууларын Ыһыаҕар кини биир уустаахтара көс омуктар дьиҥнээх култуураларын билиһиннэрбиттэригэр болҕомтону туһаайда итиэннэ манчжурдар былыргы култуураларын төрүтүгэр төннөр кыахтаммыттарыгар, өрөспүүбүлүкэ, оройуон салайааччыларыгар өйөбүллэрин иһин махталын тиэртэ.

Кэлэр Олоҥхо ыһыаҕа Нам улууһугар ыытыллыаҕа. Нам улууһун баһылыгын э.т. Ефим Гоголев кинилэр 50-тан тахса киһилээх делегациялара бары тэрээһиннэргэ кыттыбытын, алданнар кылгас кэмҥэ сөҕүмэр улахан үлэни ыыппыттарын, мантан инньэ Нам улууһун олохтоохторо эстафетаны тутан, Олоҥхо Ыһыаҕын үрдүк таһымҥа ыытарга кыһаллыахтарын бэлиэтээтэ.

«Алдан куората» куораттааҕы уокурук баһылыга Александр Бугай Олоҥхо ыһыаҕын бэлэмнээһиҥҥэ, тэрийиигэ уонна ыытыыга кыттыбыт бар дьоҥҥо махталын биллэрдэ итиэннэ Алдан сиригэр саҥа үгэс төрүттэммитин, ону кинилэр харыстыахтарын, сайыннарыахтарын бэлиэтээтэ.

Ил Түмэн спикерэ Александр Жирков бырааһынньык түмүктэнэр кэмигэр ыалдьыттар Алдан сирин сылаас тыынын илдьэ баралларыгар, бырааһынньык туһунан үтүө өйдөбүллэр, ыалдьытымсах хаһаайыннарга махтал кинилэр өйдөрүгэр-санааларыгар, дууһаларыгар хаалалларыгар баҕарда.