Ханнык хампаанньалар Саҥа дьылы бэлиэтииллэрий?

Ол курдук, ыйытыыга кыттааччылар түөрт гыммыт биирдэриттэн ордуга (27%) кинилэр хампаанньаларыгар Саҥа дьылы олох бэлиэтээбэттэрин эттэ. Оттон “Оробуочай персонал” эйгэтигэр ыйытыллыбыт дьон ортотугар аҥаардара кэриэтэ эмиэ итинник хардарда (47%).
Саха сирин хампаанньаларыгар Саҥа дьылы бырааһынньыктааһын сүрүн көрүҥүнэн тас былаһааккаларга тэриллибит корпоративтары (39%) уонна кафеҕа, рестораннарга эбэтэр кулууптарга кыттыһан барыыны (27%) ааттыахха сөп.
Кафеҕа, рестораннарга эбэтэр кулууптарга медицинскэй эйгэ бэрэстэбиитэллэрин аҥаарыттан ордуга (55%), ону сэргэ юристар 40% мустар. Тас былаһааккаларга корпоративтары үксүн сырьену хостооһун эйгэтигэр (50%), баан уонна IT эйгэтигэр (47-лии %) тэрийэллэр эбит.
Саҥа дьыл бырааһынньыга корпоратив быһыытынан (офиска эбэтэр тас былаһааккаҕа) буолар түгэнигэр, ыйытыллыбыттар 49% этэллэринэн, тэрийиинэн персо­налы кытта үлэлиир департамент дьарыктанар. Дьон 43% үлэһиттэр бэйэлэрэ тэрийэллэрин туһунан иһитиннэрдилэр. Оттон бырааһынньыгы тэрийээччинэн тас агентство буолара 5% эрэ тэҥнэстэ.
Ыйытыллыбыт дьон үксэ (91%) Саҥа дьыллааҕы корпоратив кэнниттэн үлэһиттэри ууратыы түгэнэ тахсыбытын өйдөөбөт. Ол эрээри 9% итинник түгэн баарын билиннилэр.
Оттон уһун сынньалаҥ күннэрин таарыйдахха, Саха сиригэр ыйытыллыбыт дьон былаана сүнньүнэн майгыннаһар. Кинилэр чугас дьоннорун кытта бириэмэни атаарар (45%) эбэтэр дьиэлэригэр холкутук сынньанар баҕалаахтар (43%). Маныаха түөрт гыммыт биирдэрэ кэриэтэ (24%) үлэтин салгыыр былааннаах. Оттон респонденнар 15 % эрэ ханна эрэ айанныыр былааннаах. Саҥа дьылга айаннааччылар ортолоругар баһылыыр миэстэни «Маркетинг, реклама, PR» (24%) уонна «Искусство, көччүтүү, масс-медиа» (23%) эйгэлэрэ ылаллар.
Софья Красуля,
HeadHunter хампаанньа пресс-сулууспата.

Бэлэмнээтэ Елена БАИШЕВА.